بختك اليوم "الأربعاء" من هريدى نيوز
يتكون محظوظ يتكون منحوس.. مع بختك اليوم من هريدى نيوز :
_الحمل:
لو العجلة دارت والحياة احلوّت افتكر اللى وقفوا جمبك وبلاش ندالة.. حبيبك أقل منك فى الرومانسية ما تلومهوش على إنك شبه أفلام عبد الحليم وعبد السلام النابلسى.
صحيا: عندك أزمة فى طاقتك جرب تلعب يوجا.
_الثور:
يا صاحب الصيت والمعالى هتفضل عالى وتركيزك لامع، والأعداء هتطلعلهم لسانك، وحبيبك بيموت فى دباديبك.
صحيا: ممكن تحلم إنك بتاكل كباب وكفتة، لكن دى أحلام النهضة ما تقلقش.
_الجوزاء:
هتبدأ الحياة تحلو والتركيز لسة مهم فى كل الخطوات اللى جاية، واعمل كل حاجة تاتة تاتة، وبلاش تنط على السلالم.
صحيا: استمر استمر.. شرب المية ما بيغرّقش إلا لو نمت من غير ما تدخل الحمام.
_السرطان:
إنت خبرة فى حاجات كتيرة.. ركز فى حاجة واحدة وما تكررش نفسك، مش كل يوم شيكولاتة، سنانك هتسوس.
صحيا: البنى آدم عنده كليتين ومرارة واحدة، حافظ على مرارتك.
_الأسد:
التسرع بيجيب صاحبه الأرض.. وانت مهما كنت عالى فى السما مش بعيد عن الأخطاء، عد من 1 إلى ا200 قبل ما تاخد قرار.
صحيا: العصبية عدوك الأول النهاردة، اقتلها وخليك كوول.
_العذراء:
صديقك العزيز هو الموبايل والكمبيوتر، إوعى تتنازل عنهم لأنك هتحتاجهم جدًّا وبلاش لعب على الفيس بوك.
صحيا: كُل جَزَر عشان بيقوّى النظر.
_الميزان:
لما تشك ما تبقاش دبوس ..تبقى بتفكر، خد قرار فى شكوكك وخلى حبيبك يثق فيك.
صحيا: العلاج هيجيب نتيجة قريب، بس انت بطّل تعد شعرك.
_العقرب:
أى سؤال النهاردة هتكون إجابته قلق فى قلق..عشان كدة خليك فى حالك شوية.
صحيا: حساسية الربيع حلها فحلين؛ بصل وكوباية شاى وتضيع.
_القوس:
الرأى رأيك والشورة شورتك، ومش كل واحد بيشجعك بيحبك، ممكن يكون بيدّيك حبل وعايزك تلفّه حوالين مخك اللى انت ساعات بتلبسه فى رجليك.
صحيا: كان المفروض يسموك برج "البمب".
_الجدى:
كل حلفائك ممكن يخونوك، عادى يا "جدى"، إنت مش أحسن من ريتشارد "كبد" الأسد.
صحيا: اشرب ليمونادة تعيش فى سعادة.
_الدلو:
غيّر طريقة تعاملك مع زمايلك، وخليك صاحب صاحبك، وابعد عن قلقلك ناحية حبيبك هتطفشه منك.
صحيا: ابعد عن المخلل.. الدنيا مش ناقصة.
_الحوت:
كل الأمور ماشية على هواك، وممكن تقابل حب جديد، ابسط يا عم، البس واتدلع واصرف واتشخلع.
صحيا: المشى الكتير ممكن يتعبك، اركب توك توك.