«تهاني الجبالي»: الحقوني.. المشايخ هيموتوني
"يا صغيرة يا تهاني.. يا خسارة شبابك يا مستشارة.. هيموتوكي يا ست البنات.. يا لهوي يا لهوي يا لهوي".. بهذه الكلمات وجدتها تهزي داخل غرفتها وهي تشد في شعر رأسها ترفعه إلى أعلى كأنها تريد أن تشق به السماء لتهرب من مصير غامض.. قلت: مالك يا تهاني هانم كفاالله الشر؟!! .. قالت: الحقينى يا سطوطة ياختي المشايخ هيقتلوني وبيهددوني من امبارح!!.. قلت وعلشان كده قاعدة تولولي ومارُحْتِيش المحكمة الدستورية النهاردة؟!.. قالت: أروح فين يا سطوطة أروح فين؟.. بقولك هيموتوني يا ولية هيموتوني انتي ما بتفهميش؟!.. قلت: طب ويموتوكي ليه.. هما بالكتير مش هيدخلوكي المحكمة تاني!!.. قالت: يعني ما فيش مرتب الشهر ده يا سطوطه.. إنتي عارفة أنا بقبض كام في الشهر.. مليوووووووون.. مليون يا سطوطة!!.. قلت: يا ستي عادي كفاية الملايين اللي عندك!!.. قالت: لا مش كفايه.. أنا المرأة الحديدية.. أنا أذكى امرأة في مصر.. أنا أبو تريكة مش أحسن مني علشان يكون عنده فلوس أكتر مني.. هيموتوني يا سطوطة هيموتوني!!.. قلت: إيه يا ست إنتى.. هو إنتى خايفة على القبض بتاع الشهر ولا على قبض روحك؟!.. قالت: لتنين .. لتنين يا سطوطه ياختى.. مرسي خلاص هيخلص عليا وهيبعتلي المشايخ يموتوني.. أنا طول الليل بحلم بالشيخ «محمد حسان» وهو بيصلي عليا الجنازة وبيدعي ربنا يولع في جتتي بجاز وكل المشايخ حواليه بيقولوا أمين يا سطوطه!!.. قلت: لكن قوليلي يا ختي.. هما المشايخ بيكرهوكي كده ليه؟!.. قالت: علشان أنا الوحيدة اللي فهماهم صح.. والوحيدة اللي بإيدي أحل مجلس الشعب والشورى والدستورية وأحل وسطهم كمان!!.. قلت: طب وإنتى بتدخلي السياسة في القضاء ليه يا هانم؟!.. قالت: القضاء سياسة والسياسة قضاء يا سطوطة وما فيش فصل بينهم، وإلا الناس دي هتاكل البلد أكل.. دول ممكن ياكلوكي يا سطوطة ويأكلون الأطفال في الشوارع والبنات القصر باسم الدين!!.. وهنا نظرت في عين المرأه فرأيت فيهم صورة الشيخ برهامي يحملق في جتتي فهرولت خارجة من غرفتها وأنا أردد لِبْسُوكِي يا تهاني لِبْسُوكِي يا تهاني!!
