نص التحقيقات مع تيمور السبكي بتهمة سب نساء مصر

وإلى نص الأقوال..

اسمى تيمور أحمد عباس أحمد السبكى، 37 سنة، المهنة مدرس

ما قولك فيما هو منسوب إليك من إشاعة أخبار وبيانات كاذبة؟

اللى حصل إن أنا كنت ضيفا على قناة cbc الفضائية مع خيرى رمضان في موضوع حلقة عن المتزوجين، وكان موضوع الحلقة اللى أنا بتكلم فيه عن المتزوجين وإن أنا رسول بنقل اللى جالى على صفحتى، "يوميات زوج مطحون" اللى فيها ربع مليون عضو، فتطرق الإعلامي خيرى رمضان إلى أغرب الرسائل الواردة اللي على صفحتى، وكان ردى إن أنا هقول ليك إحصائيات الصفحة عندى فيها زخم والرقم ليه مدلول أنا أقدر أقول إن نسبة 30 في المائة عندهم استعداد للانحراف، بس مش لاقيين اللى يشجعهم، وضربت مثلين كانوا عندى ع الصفحة وكان قصدى على النسبة دى هي نسبة الصفحة ومش كل الستات، وما خصصتش المصريات لأن الصفحة عندى فيها من كل الجنسيات، ولما خصصت محافظات الصعيد كان كلامى أن عندهم مشكلة زواج الصالونات لأنه منتشر جدًا، واللى خلانا نتكلم عن الصعيد كان خيرى رمضان، لما ذكر كلمة "هريدى" في الموضوع وكان الموضوع ضحك، وكان حوارى في سياق متكامل اجتزء منه الجزء ده، وأنا تم استضافتى في الحلقة على أنى أدمن صفحة ساخرة كوميديا وكان كلامى عن الصفحة ما فيهوش تعميم ولم أقل كل أو جميع، ولم أطعن في شرف النساء أو الرجال ولم أقصد أي إهانة أو إساءة لأحد، وانتهت الحلقة على كده، وأنا عرفت  اليومين اللي فاتوا إنى مطلوب ضبطى وإحضارى للنيابة، تواصلت مع ضباط المباحث ورحت محكمة الدقى، وبالقرب منها قابلت اتنين ضباط واصطحبونى على النيابة مباشرة.

متى وأين حدث ذلك؟

الحلقة كانت يوم 9 ديسمبر 2015 على قناة cbc مع الإعلامى خيرى رمضان

من كان برفقتك أثناء ذلك؟

كان معايا الكاتبة أمانى درغام والكاتب إيهاب معوض وكان في ولد وبنت متزوجين

ما سبب تواجدك في الحوار؟

أنا استدعيت واتطلب منى أكون موجود في الحوار لأنى صاحب ومؤسس صفحة "يوميات زوج مطحون"، أكبر تجمع للرجال المتزوجين في مصر.

ما قولك فيما قدم من بلاغات أمام النائب العام ضدك واتهامهم لك جميعًا بقذف نساء مصر المحصنات واتهامهم بالخيانة والزنا بصفة عامة ونساء الصعيد بصفة خاصة؟

ما حصلش

وكيف استبان لك أن 45 في المائة من المشاركين في الصفحة والمتابعين عندهم ذلك الاستعداد إن صح قصدك؟

أنا قصدى إن دى شريحة عشوائية من الرسائل ودى اللى أنا أخدت عليها النسبة.

وما قولك وقد قررت في أوراق التحقيقات أن مقصدك هو نسبة من المشاركين في الصفحة أي أكثر من نصف مليون؟

أنا كنت أقصد أن دى رسائل مش إجمالي الصفحة وأنا قلت كده في الحلقة وماكانش قصدى كل المتابعين في الصفحة وأشرت أن دى رسائل الصفحة وما أنا إلا رسول.

وما قولك وقد ثبت في تلك البلاغات أنك قررت أن ظاهرة الخيانة منتشرة جدًا والرجال متغفلة ومطحونة في العمل وخاصة فيمن كن أزواجهن مسافرين في الخارج؟

أنا ما قولتش خائنين وقلت في الحلقة إن عندهم استعداد للانحراف ولكنهم مش منحرفين وكان كلامى على نسبة الرسائل اللى بتجيلى مش على عموم الناس.

وما قولك وقد جاء في تلك البلاغات اتهامات بأنك خصصت محافظات الصعيد بذلك؟

أنا كان قصدى إن الصعيد كان منتشر فيه زواج الصالونات فده بيكون سبب للانحراف وده كان بناء على سؤال اتوجهلى وأنا بوضح الأسباب التي تؤدى إلى الانحراف من وجهة نظرى

وما قولك بمشاهدة تلك الحلقة ثبت اعتراض كل من الإعلامى خيرى رمضان والكاتب إيهاب معوض عما قررت؟

هما مافهموش كلامى وما جبتش سيرة المجتمع وكلامى كان خاص بشريحة من الرسائل وفهموا كلامى على محمل خاطئ، وأنا كنت أقصد مجموعة من الرسائل العشوائية في الصفحة.

وما تعليقك وقد بقيت صامتا ولم ترد عليهم وتوضح وجهة نظرك على الهواء مباشرة؟

أنا لا أدير الحوار ومن يدير الأمر هو المذيع خيرى رمضان ودوري الإجابة على السؤال فقط، ولكن قاطعت الضيوف الآخرين في الحلقة عندما لاحظت سوء فهم في التصريح المسير للجدل قمت بتوضيح الأمر في نفس الحلقة وقلت "خلى بالك يا أستاذ خيرى أنا كلامى دقيق جدًا و30 في المائة من السيدات عندهم استعداد للانحراف" وهذا معناه إنهم مش منحرفين وكررتها حتى تصل الفكرة بوضوح والكلام على عموم النساء وليس نساء مصر فقط.