على اسم مصر «2» لـ«صلاح جاهين»

كتب صلاح جاهين الجزء الثانى من قصيدة "على اسم مصر" بعد عودته من موسكو فى خريف 1971 - وهذا الجزء لم يكتمل - والتى يقول فيها:

أنا الذى مشيت ادوٌر باشتياق وحنين
على مصر والمشى خدنى من سنين لسنين
لحد ماسنيـنهـا وسنـينى بقم واحد
وعاصرتها يوم بيوم لم فاتنى يوم واحد
وحضرت شاهد عيان مولد وموت ملايين
ما زعلت من كلمة قد البركة فى الجايين
مين هم دول يا جدع.. ما توحد الواحد
البركة فينا وفى السامعين بالواحد
أنا قلتها بنرفزة.. من غيرة الواحد
على اسم مصر

مصر الرمال العتيقة وصهدها الجبار
والنيل كخرطوم حريقه وحيد فى وسط النار
فى إيدين بشر نمل رايحه وجاية ع الضفة
فيهم مطافى وفيهم كدابين زفة
وفيهم اللى تعالى وقال أنا حكمدار
وكل باب م البيبان مقفول على أسرار
وكل سر بحريقة عايزة تتطفى
من أهلى تندهلى وتقوللى تعا اتدفى
أنا اللى عمرى انكتب إلى يوم ما اتوفى
على اسم مصر

على اسم مصر ارفعوا الأنخاب واملولي
شدوا الوتر ع القمر يا شباب وغنولي
نسكر على حبها بالفن والإحساس
نسكر ودمع الحماس يملا لنا تانى الكاس
إحنا يا حلوه الفدا بس اطلبى وقولي
يا سمره بعيون كده وسِنِّتك لولي
وغنوة الحب تعلا ويسمعوا الحراس
يصفروا ويحضروا بفرقة طبول ونحاس
ويتقفل سجن مصر أمام عيون الناس
على اسم مصر

والمطبعة تدور وتخطف كل إيد منشور
عيش لسه م الفرن طالع ريحته ريحة النور
يا فلاحين يا جنود يا طلبة يا عمال
عدوكم حلف الاستعمار وراس المال
عاش الطريق الاشتراكى قوم يا شعب وثور
وحكمكم حكم إقطاعى عميل مأجور
عاش الكفاح بالسلاح إلى القنال يا رجال
خلوا حياة الانجليز المستقرة محال
والشمس نامت ليلتها وفكرها شغال
على اسم مصر

القاهرة فى اكتئاب والأنس عنها غاب
من عتمة تدخل لعتمة كأنها ف سرداب
أو قرية مرمى عليا ضل هجانة
الحظر م المغربية بأمر مولانا
ومصر فى الليل بتولد والبوليس ع الباب
صبية ولاٌدة يابا ولحمها جلاب
طلع الصباح زغرطت فى السكة فرحانه
على كتفها مولودتها لسه عريانه
وف لحظة كانت جميع الدنيا دريانه
على اسم مصر

على كتفها مولودتها وتجرى وتنادي
يا ولادى من يوم ميلاد الأرض يا ولادي
ينهض لها أمحتب بدواه يقويها
وبنتاؤر ينشد الأشعار يهنيها
وسعد زغلول يكح يزلزل الوادي
وعرابى يهمس ومصر ترد بتمادي
تقوله آه برضه ثورة جيش وح احميها
بالدم بالروح بكل حياتى ح افديها
أما الأسامى معنديش غير اسمها
على اسم مصر

مولودة كبرت وشبت فى تلات تيام
من هبة هبت .. لثورة لبت الأحلام
والعرش عام راح إيطاليا بعيد ورا البراميل
يا هلترى دى حقيقة وللا وهم جميل
ومصر من إمتى كانت حظها بسام
ظهر قميص العرق متشمر الأكمام
أنا شفته عقلى برق وبدأ لصاحبه يميل
نقشت له ف قلبى احلى وأروع التماثيل
بدراعى والمطرقة وبإيدى والأزميل
على اسم مصر