بالصور.. 15 نصيحة لأول يوم في الجامعة

نشرت صفحة «خمسة بلاس حاجات» عبر موقع التواصل الاجتماعى «فيس بوك»، مجموعة من النصائح للطلاب الجدد حول أول يوم في الجامعة، والتي تعد مرحلة جديدة في حياة طلاب السنة الأولى.

بدأت الصفحة حديثها حول هذا الموضوع: أن «أهم استعداد للمرحلة دى إنك ما تستعدش لحاجة»، ثم نشرت الصفحة 15 من النصائح والحقائق عن أول يوم جامعة بقلم «محمد طلعت» وكانت كالاتى:

1 - أول ما هتدخل من باب الجامعة هتلاقى بنتين حاضنين بعض في وضع ثابت لمدة ربع ساعة لدرجة أنك هتشك أنهم توءم ملتصق.. ما تقلقش دول ما شافوش بعض بقالهم إسبوعين فالموضوع مؤثر شوية.

2- لما هتسأل حد على مكان أي مبنى أو مدرج هايضحك ويوصفلك المكان دة مابيتريقش عليك هو بس افتكر أول يوم له في المخروبة دي كان في أغسطس 84 فى عز الحر.

3- أكيد هتقابل دكتور أو اتنين بيحبوا ينجحوا البنات الحلوين بس دي مشكلتك أنت مش مشكلتهم اتصرف إن شا الله تتحزم وتروحلهم.

4- فيه واد سيس هتلاقيه لابس بينك وسلاسل وحظاظات وواقف مع بنات دايما لأ ده وحش ماتصاحبهوش علشان مايأثرش فيك مستقبليا.

5- أنت داخل تتعلم مش داخل تظبط بنات أو تدور على عروسة واهدى بقا ها اهدى.

6- ماتفكرش في مستقبلك بعد الجامعة من دلوقتي وماتسألش ليه.

7- ماتفكريش ترتبطي بحد من الجامعة وماتسأليش ليه برضه.

8-بصي يا بنتي مذاكرتك في دماغك قلمك ومسطرتك في كيسك مطوتك في جيبك اللي يقولك نرتبط قطعيه.

9- مفيش حاجة اسمها الجامعة هاتحررك من القيود الاجتماعية أو الأسرية والنقطة دي هاتفهمها في آخر سنة ليك في الجامعة.

10- ماتنزلوش أول يوم الجامعة.

11- ركز قبل ماتوصل الجامعة في حاجة واحدة من الاتنين يا تتعلم يا تكون صداقات مع ولاد وبنات وتبقا واد فيمص وفى الحالتين هتفشل وهتتخرج لوحدك لا أصحاب ولا كتب.

12- هتشوف أسوأ أربع خمس سنين في حياتك واما تتخرج هتكتشف أن الأيام السودة دي كانت أحلى سنين حياتك تخيل.

13- هيعدي عليك وقت هتفكر تسيب الكلية ده انفعال بس ماتخافش مش هتعرف تعمل حاجة.

14- ماتتعاملش مع شئون الطلبة إلا اما تاخد خلفية عنهم من حد قديم في الكلية.

15- محدش يرتبط من الجامعة.