«النهارده العيد» قصيدة لسعيد شحاتة

عيد سعيد يا امّ الغلابه
عيد سعيد يا امّ العيال
عيد وفايت بالربابه
يحكي للناس عن جمال
عن رجال طاحوا الديابه
عن وطن أمّم قنال
عن سؤال محتاج إجابه
عن إجابه بدون سؤال
.................
مصر ليلة العيد بتضحك
مصر ليلة العيد نهار
شايله فوق راسها الصواني
وماشيه بتوزّع فطار
والشوارع عيش بسكّر
والبيوت دراويش وزار
والهزار عمّال يجلجل
والأغاني ف كلّ دار
يا ملامح روح بلدنا
يا وطن فوق كل مدنه
يا جرس علّم ولادنا
الحكمه في سنين لانتظار
.............
النهارده العيد يا شارع/ يا قهاوي
يا حبيبتي الواقفه تحكيلي الحكاوي
ناوي أبوس إيدك وأنا مسافر أجيبك
وأرسمك ضلايه وأعملّك مداوي
...............
النهارده العيد يا زمّار يا انتهازي
يا اللي كان نفسك تمكّن كلّ غازي
يا اللي لما بنبتسم بتموت بغيظك
وأما نحزن لحظة تفرح بالتعازي
.................
النهارده العيد يا ابويا اللي ف خيالي
واللي دايمًا صورته بتشاغل في بالي
عمري يا به ما حدّش إداني العيديّه
وأنت غايب مين يا والدي هيدّيهالي
..............
النهارده العيد يا كل حبايبي قوموا
يا اللي رغم وجعكو قررتم تصوموا
ربنا يقبل صيام كلّ اللي حاول
ويباركله ف صومه ويكبّر له كومُه
...........

النهارده العيد
يا شاعر/ يا صنايعي
ياللي جايبالنا العدو ودايمًا تبايعي
لسه أرواح الشباب فوق المساطب
اللي عازب واللي خلّف واللي خاطب
واللي كان ع البنت متكلّم وكاتب
لسه أحلام الشباب جوّا الحواري
لو هييجي القرش من وسط المجاري
كل أحلام الشباب كانت بسيطه
لما غيرهم كان بيحلم بالجواري
...............
النهارده العيد سلامًا للشهيد
النهارده العيد ومبروك الشهاده
النهارده العيد يا حبلانه بنشيد
النهارده العيد وأرواحكم ولاده
واللي غايب يبقى يكتب للبعيد
مصر لسّه الرمز وشعار السياده
لسه عايشه بشعب فايت في الحديد
لسه قادره ولسّه فوق كرسي الرياده
قادره بالمواويل وبكتابها المجيد
-قادره بالدعوات وببيوت العباده-
...........
النهارده العيد يا كحك ويا حكايات
يا بنات منقاشها ينقش في الصاجات
قلبي في الفرن المقابل طلعوني
وارسموني هلال وبسكوته وحاجات
..........
النهارده العيد يا عاشق/ يا عشيقه
يا القلوب العايشه تحلف بالحقيقه
يا وطن واقف على حدوده بداناته
يا عريس للجنّه رايح بالدقيقة.