بالصور.. أطرف مواقف النشطاء في الأفراح.. توتا:«اتخانقت مع عريسي وقعدت بالفستان عالرصيف».. شيماء: «العيال كانوا بيشكوني من ورا الكوشة».. سلمى:« وقعت بكامل أناقتي في الفرح»
حادثة بسيطة قد تحول حفل زفاف بهيج إلى واقعة طريفة أو كارثة، حيث دائما ما يصاحب مثل تلك الحفلات توتر وتزاحم في الأحداث مما يجعل أقل شىء يشعل مشاجرة بين طرفى الحفل.
روى مستخدمو مواقع التواصل الاجتماعى أكثر المواقف المضحكة التي شاهدوها خلال أفراح عبر صفحة "الكومنت الجاحد" على موقع التواصل الاجتماعى "فيس بوك".
المكياج وألاعيبه
قال محمد:" رايح فرح بنت عمى، مرات عمى شبه عمتى شويه والمكياج كان تقريبا واحد وكانوا لابسين فساتين نفس اللون، المهم عمتى وأنا مبحبش مرات عمى أصلا وأثناء الزفة والناس بتسقف وفرحانة روحت جنب عمتى وفضلت اتريق على مرات عمى واشتم فيها وعمتى ساكته مش بتتكلم، وبعد ماقولت اللى عندي وبعبعت لاقيتها بتبصلي واكتشفت أنها مرات عمى اللى عمال أشتم فيها بقالى ساعة، ومن ساعتها والعيلة واقعة في بعض بسببي".
قعدت بالفستان عالرصيف
وأضافت توتا: "والله الموقف كان في فرحى نفسه، في الزفة اتخنقت أنا وجوزي وخرجت من العربية قعدت بفستان الفرح على الرصيف وأصوت وأقوله طلقنى وهو يزعق قومت قالعة الجذمة ومشيت وسيبته وهو يجرى ورايا هو وأصحابه والناس كانت بتتفرج من البلكونات كنا مسخرة بس الحمدالله في تالت سنة متجوزة".
جيت أنقذ طفلة وقعت معاها
وروت نها:" يوم فرح أختي شوفت بنت بنت خالتى طفلة وقعت والمصور هيدوسها جريت أنزل عشان الحقها اتزحلقت وهوب على الأرض جمبها المهم وأنا بقع طفلة تانية مسكت قفا وبقيت أنا والطفلتين فالأرض ومن كتر الضحك مش عارفة أقوم أقف على رجلى، لا كمان ماما قاعدة قدامي مش تقوم تشدني قاعدة على الكرسي وتقولهم ياعيني بنتي الكبيرة وقعت".
العيال شكونى بالشوك
وتذكرت شيماء:" الكوشة بتاعتي كانت مفتوحة من وراء، المهم العيال الصغيرة عرفوا لموا بعض وهاتك ياقرص في رجلي كان معايا هوايه راحت مطبقها وبقيت امد أيدي واضرب على أساس يبطلوا راحوا جابوا الشوك بتاعت الجاتوه ومرمطولي رجلي".
العريس مبرشم
وقال حسام:" كنت رايح فرح العريس كان سكران ومبرشم وخارب الدنيا خلع البدلة، وقعد يرقص لوحده ويجري لأول القاعة ويرجع تاني ومحدش عارف يحكم عليه لحد ما شرب قهوة".
وأضافت يارا:" كنت في فرح وأنا ماشية وقعت على وشي حته واقعة، المهم قومت عادي وفضلت اضحك على شكلي والراجل بتاع البوفيه وهو جاى بيقولي هو حضرتك الأنسة اللي وقعت قولتله هو الخبر وصل لحد فين، قالى لحد الشيف في الطبخ جوا".
البوفيه
وتذكرت نسمة:" كنت قبل كده في فرح واحدة قربتي، واحدة راحت قالتلي ممكن تروحي تسئلى البوفيه هيفتح امتى وهي كانت ست كبيرة روحت اسأل اللي كانوا واقفين هناك قالولي لأ، روحت رجعت قعدت تانى شوية راح ندهوا عليا بصوت عالى ياأستاذة البوفيه فتح اهو".
ده اللى سبتينى عشانه
وروي محمد:" واحد صاحبي اخدني معاه فرح بالعافية بتاع واحد معرفته، المهم قالي تعال نروح نسلم عليه واحنا رايحين بقوله أنا عاوز أقول للعروسة بصوت عالي هو ده اللي سبتيني علشانه واطلع أجري فضل يضحك ومش عرف يقول للعريس مبروك حتى".
وقعت بكامل أناقتى
وقالت سلمى:" كنت بكامل أناقتي وطلعة على السلم قومت واقعة قدام الناس".
واستطردت آية:" كنت في فرح صاحبتي وقولت مش البس النضارة وزي الفل واشطة وعمال اضحك وخلاص لأي حد ومش شايفه أي حاجة، كل شويه حد يجي يسلم عليا وبيكونوا بيكلموني من بعيد كدا وأنا ولا الهوا اضحك وخلاص لحد لما يقربوا اه ازيك عاملة ايه معلش، مش كنت شيفاكي بس كان يوم مسخرة ومن يومها مش عدت بمشي غير بالنضارة أو النسيز".
