بالصور.. أغرب لمسات الفتيات المقبلات على الزواج في منازلهن.. لمياء: مفيش نيش.. سارة: برواز فيه ذكريات.. سمسمة: قعدة عربي.. دينا: أوضة للصلاة.. بسمة: سرير بيلف.. هالة: مكتبة وكل ركن بيتكلم عن شخصيتنا
تحلم كل فتاة بتصميم منزلها المستقبلى على ذوقها الخاص، والذي سيصبح مملكتها الصغيرة التي ستزينها بالحب والمودة وبعض لمساتها السحرية المنمقة التي ستضيف سحرا خاصا على أجواء المكان، وقد أسرع عدد من الفتيات المقبلات على الزواج في سرد لمساتهن المميزة اللاتي سيضعنها في منازلهن.
مفيش نيش
قالت لمياء: "مفيش نيش هيتحط والشقة كلها أسود في سيلفر، وركن كده فيه sound system ، وبوستر كبير بطول وعرض الحيطة عليه صورة عمرو دياب، وحيطة تانية هنحط فيها كل صورنا".
برواز ذكريات
وعلقت سارة قائلة: "هعمل برواز كبير فاضى أجمع فيه كل الذكريات على مدى السنين اللى جاية".
قعدة عربي
وأضافت سمسمة: " قعدة عربى وهرسم صحرا 3D عالحيطة".
أوضة للصلاة
وقالت دينا: "أوضة للصلاة وللقرآن ونسميها المسجد وفى نفس الركن مكان لقراءة الكتب"، وأضافت هند: "هيبقى ليا أوضة ولسعيد الحظ أوضة عشان نحترم خصوصية بعض".
فلبينية بالنهار
وتابعت آية: "هعمل فلبينية بالنهار ودادة للبيه بالليل"، وأضافت شيماء: "أوضة وهقسمها نصين، نص للـPC، والـXBOX وبوسترات للجيمز وإضاءة غريبة عشان أنا وخطيبى جيمرز، والنص التانى للصلاة فيها عشان نصلى فيه مع بعض إن شاء الله".
وسعاية في المطبخ
وعلقت ياسمين قائلة: "هعمل حيطة عليها صور لكل الناس اللى بحبها"، وقالت ناريمان: "وسعاية كده في المطبخ عشان أجيب الأكل بالكراتين".
بانيو بيتحرك
قالت بسمة: "أولا هجيب بانيو بيتحرك، وسرير بيلف وكرسى نازل من السقف أتمرجح فيه"، ومطبخ أمريكان وسيراميك 3D"، وأضافت
جومانا: "هنعمل مطبخ أمريكان ونفتح الحمام عالريسيبشن عشان محدش يجيلنا"، وهعمل صور بناتى 3D بحجمهم الطبيعى في الليفينج عشان كل ما أشوفهم أتبسط".
مكتبة
وعلقت هند قائلة: "هعمل أوضة فاضية كلها لعب أطفال وممكن أعمل بلكونة كبيرة وأملاها ورد وزرع وعصافير وبيت صغير للقطة بتاعتى"، وأضافت هالة: "بفكر جديا ألغى النيش واستبدلها بمكتبة لذيذة وكرسى هزاز عشان أما آجى أقرأ استجم وإن شاء الله هخلى كل ركن في بيتنا يتكلم عن شخصيتنا مش عفش في بيت وخلاص".
بلياردو كافيه
فريدة: "هخصص أوضة نعملها بلياردو كافيه"، وأضافت نعمة: "هعمل أوضة كافيه أجيب فيها صحابى نقعد براحتنا أما يكون الجو تلج".
