«آخر قصيدة حزن» للشاعر البوهى

يقول الشاعر «أحمد البوهى» فى قصيدته «آخر قصيدة حزن» من ديوان «تالت حلم يمين»، والصادر عن «دار دوّن» للنشر والتوزيع:
ماتدمعيش
أنا أصلى مش هقدر أكونلك
غير مافيش
جواكى شوق مابينـتـهيش
وأنا بنـتـهى
بيتوه شراعى ومركبى
فــ بـحر الحياة
ولا يوم عرفت أوصل لــبر
ولا يوم عرفت البحر فين آخره ومداه !!
أنا زى موجك يا هوى
بيروح لحد الشط مفرود الجناح
وبـيـنـتحر
حُر بـرِضاه
فيك المراكب ورق يابحر
بتسافر
وأنا زيـــَّها بعافر
بتحب فيك الغرق
وتحب فيك الحياة
فمتسأليش عن غيابى
وحالى فى غيابك
ووفرى عتابك
أنا كـنت كدابك
وفضلت كدابك
أسرنى فيكى الحنين
ومشيت ورا عتابك
ودخلت من بابك
وخرجت من غير قلب
حبك ذنوب .. مش ذنب
وأنا ما احتملش عذاب ..
حبك ..
أمل كداب
بـتذكَّـر الحزن فيكى
وفـ صَـمت تـنهيدك
وخانِّى تفكيرى
وتعبنى تفكيرك
وعشان أعوض لقلبى حُبِك المهزوم
حبيت كتيـــــر غيرك
ولسه من غيرك
ما اعرف طريق للرجوع
لو عارفة معنى السفر
أجمل ما فيه الدموع
لو عارفة معنى السفر
هتقولى روح سافر
حقق لدمعك مناه
وأنا زى مركب ورق
يا بحر بيعافر
بيحب فيك الغرق
ويحب فيك الحياة
الغربة ما سابـيتـنيش
وحلفت .. ما هسيبها
آخر قصيدة وجع يا حزن هكتبها
والوزن لو مكسور خـُدها .. على عيوبها
فصـَّلتلى توبها
وماسيبتليش اختيار
خمس سنين والقصايد
بتعيد فى نفس المعانى
وبتعزف اللحن شارد
وتـنـُوح على الأوتار
وبتعشق الأشجان
وتمجّد الأحزان
والحزن أصله جبان
الحزن ما بـيـبكيش
الحزن بــيـبـَكــِّى
والغربة مبتشكيش
الغربة بتشكــِّى
فمتسأليش عنى
وتشُكّى، وتظنّى
أنا مش بخاف منك
لـــــكن .. بخاف منى ..
أنا لست دون الهوى
لكنّنى ندم ٌ
فالعشق فيكى تفرقٌ
والهجر فيكِ كما اشتياق
ذُق لم أذق
فجميعهم ..
مرُ المذاق ..
سأقاوم هجرَك رغمًا عنّى
ولن أشتاق ..
سأقاوم هجر البسمة
من وجهى
خشية إملاق ..
سأعود إلى نفسى يومًا
وأعانق فيها الحُلم وأهرب
من صمت الأوراق