"لما الشمس تغيب في نهار" قصيدة لـ"مينا اميل يوسف"

لما الشمس تغيب في نهار
وتظهر تانى في عز الليل
لما الميه تصاحب نار
ويبقى الحر في عز السيل
نبقى في آخر يوم في الدنيا
أو في حاجة غريبة في الكون
يمكن نطلع لحياة تانية
أو الكون أصبح مجنون
لما الدنيا بتدى الخايب
لما الحلوة تحب الشايب
لما الكل بيمدح عايب
وبنتعلق في حبل دايب
لما حصان السكر يمشى
لما عروسة المولد تحشى
لما الشيخ الطيب يرشى
لما الدكتور ما بيفهمشى
لما السفاح يبقى براءة
وحرامى العيش بيعاقبوه
لما النصب بيبقى جرأة
والحقانى بيسبوه
لما العادى في جيبه حشيشة
والمتدين يشرب شيشة
وست عجوزة بتلبس خيشة
وناس بطالة في أحسن عيشة
لما الظابط بيسوق عكسى
وأعظم عالم أصبح منسى
لما أكون فخور بكوارثى
وأسهر أحب في هيفا ونانسى
لما الأب ينام مع بنته
لما الابن يموّت عيلته
لما الأخ بيضرب أخته
لما الكل بيكره عيشته
لما التوك توك يبقى العادى
والعربية تبقى غريبة
لما محاسب يبقى منادى
ويفضل ينده عايدة وطيبة
لما أم الدنيا بتشحت
وشعرا يهاتوا يقولوا حضارة
تبقى العاقلة الباقية انتحرت
وهم في ندوة يقولوا منارة
لما بلد كلها عواجيز
وشباب حاسس بالتعجيز
أصله محروم من التحفيز
ومحطوط صوره في البراويز
لما شاب يكفر ناسه
علشان فكرة غريبة في راسه
بقى حيوان مات إحساسه
قام داس على الكل بمداسه
لما حرامى واحد يسرق
كام ميت مليون مليار
وملايين بتهاجر تغرق
قبل ما تشوف الدولار
لما ملايين تخرج ثورة
ثورة تطالب بالتغيير
ونرجع تانى لنفس الدورة
ولا تغيير ولا حاجة تصير
يبقى أنا حقى إنى أتجنن
وأعيش في سراية المجانين
ما هي عمرها ما حتتمدن
والمدنية حتيجى منين
وأكيد في سراية المجانين
حرجع تانى طفل جنين
وأنا لطفولتى عندى حنين
وأهرب من البنى آدمين
وأرجع ألعب ما أنا مجنون
ممكن أعمل فيها نيرون
وأولع كل مهازل الكون
ما هو أصله بصراحة ملعون
وأبنى بإيدى كون من تانى
فيه الطيب والحقانى
فيه الغلبان مش بيعانى
ولافيش فيه مكان لأنانى
حعمل سقف البيت بسحابة
والعمدان بشعاع النور
وأبعد عنى كل كآبة
وأفضل عايش هنا وسرور
أصل الدنيا دى بقت غابة
مليانة من أشرسها ديابة
والغابة ما تعرفش طيابة
والمثل اتحرقت في خرابة
بسيفى الخشب حأدب عاصى
وبيه أنا ححمى في أهلي وناسى
وخلاص خلصت كل مآسى
وأنا بجنونى مريّح راسى.