جوابات «عيد السوهاجي » و«بدرية عبد الستار»!
ياه عليكي يا دنيا ياه
أبويه اللي بني السد زمان
وأنا النهاردة رايح أحفر قناة
ياه عليكي يا دنيا ياه
أنا الاسطي عيد السوهاجي
ولد المرحوم حراجي
صح أنا ما كملتش علام
لكن حب الوطن عندنا وراثة
وحكايتي عاملة ولا الأحلام
ماهيش في كتاب ولا كراسة
أول رجل تحط فـ أرض القناة رجلي
مصر لما نادت سبت العيال طلعت أجري
***********
وبعد 30 يوم م الغيبة يا أحباب
بأبعت لزوجتي أول جواب
ــــــــــــــــــــــــــــــــــــــــــــ
الجوهرة المصونة
والدرة المكنونة
زوجتنا الغالية: "بدرية" عبستار
وحشتيني يا بت الذين
الفاتحة من غيرك ما لي سكن ولا دار
سامعك بتقولي "المشندل" باعت ليه جواب ؟
يكون البوسطجي كداب ؟
أمال "محموله" فين ؟
الحكاية يا بدارة فـ كلمتين
ورثي من أبوي يا بت الناس
هتلاقيه فوق الدولاب
ورقات قديمة مقطوعة من كراس
كل ورقة فيها جواب
من أبويه حراجي القط لما كان فـ السد
صاررهم ف منديل والله ما شافهم حد
لأمي فاطمة أحمد عبد الغفار
فـ بيتنا القديم اللي كان فـ جبلاية الفار
وأنا النهاردة شايفك فاطمة وأنا حراجي
علشان كده كاتبلك جواب
عامل أيه الواد دياب ؟
خلية هو اللي يقرالك الجواب
طمنيني عليكي يا وكلاهم
30 يوم والنوم ما زار عيني
ما أعرف أن كان زعلان ولا هيلف يلف ويجيني
شغال ليل ونهار
واليد اللي ما تشقي ما. تلقى
وفـ مكان واسع معرفلوش غربة من. شرقة
إلا بالحق
أفرحي يا حزينة وفرحي عيالك
أنا فـ القناة باسوق حفار
اه يا بدرية لو شفتي الأنفار
وتشوفي الضحكة على وشوش الجتت التعبانة
وتشوفي الناس برغم التعب والشقا
بردوا الناس فرحانة
النهاردة جات دفعة عمال جديدة
شفت ف عنيهم دمعة بعيدة
زي دمعتي يوم ما سبتك يا بدارة
والنبي عاملة أيه الناس اللي ف الحارة ؟
سلمي لي عليهم واحد واحد
وأدينا بنكدب ع الأيام وبتواعد
سلميلي على كل اللي يسأل علينا
بدرية. يا بدارة عايز أقولك حاجة بس أنا
" كشمان"
غمضي عيونك الجواب خلص كلمتين وهاكتبلك العنوان
أنتي حبيبتي ودنيتي وأنتي الفرحة اللي بتنور ليالينا
يا غالية علينا
معانا بشمهندس زي العسل بيحكيلنا حكاوي
ويسمعنا أحلي حوار
وزي ما أنتي شايفة
خلاني فيكي أقول أشعار
يصل وسلم ليد زوجتنا الغالية: بدرية عبستار
اللي ساكنة فـ سوهاج ـــــــ قرب المطار
من طرف زوجك: الأسطي عيد السوهاجي
ولد المرحوم حراجي
استني يا بدرية. استني يا بت
أنا هاستني جوابك على نار
