"في فطار محبة رمضان يجمعنا" قصيدة لمينا إميل يوسف

في فطار محبة رمضان يجمعنا
فطار محبة له ألف معنى
وفى الراديو رمضان جانا
غنى يا عبد المطلب وسمعنا
غناك لأيامنا الحلوة يرجعنا
وبعودة يا رمضان تمتعنا
والزينة ويا الكهارب
مناظر محفورة في الوجدان تدمعنا
ونيللى في الفوازير
وألف ليلة والأساطير
بوجى وطمطم
فيها حواديت كتير
ومسحراتى في الفجر بيصحينا
يفضل يطبل وينادى على أسامينا
محمد وحودة وأخوهم مينا
رمضان في مصر كلنا مع بعضينا