لقاء لا يمكن حدوثة

الكاتب قد يسرح ويطوف بخياله إلى أبعد حدود، لا شيء يستطيع أن يوقف إبداعه المهم ألا يضر هذا الإبداع بالآخرين.

في وحي خيالي وقع هذا اللقاء ودار هذا الحوار بين مبارك ومرسي، في زيارة المعزول لزنزانة المخلوع، بناء على طلب الأول بعد سجنه.

مرسي: السلام عليكم يا أبو علاء
مبارك: وعليكم السلام يا أبو أحمد ازيك يا مولانا
مرسي: والنبي يا شيخ مش عايز تريقة ما تخلينيش اندم اني جيت ازورك
مبارك: يا عم ولا اتريق عليك ولا تتريق عليا ادينا بقينا في الهوا سوا المهم أن انت ايه اللي جابك عندي
مرسي: انا قلت اشوفك عامل ايه واطمن عليك
مبارك: هههههههههه لا فيك الخير والله. صاحب واجب يا راجل بلاش الكدب بتاعكم ما حدش في الدنيا دي كلها عارفكم قدي.. صارحني احسن لك.

مرسي: والله انا قلت اجيلك يمكن تلاقي لنا حل في الوقعة المطينة اللي وقعنا فيها دي ولا انت عاجبك الحال اللي احنا فيه ده بقي رؤساء مصر يترموا في السجون كدا واحد ورا التاني هو الشعب دا ما حدش قادر يلمه ولا يوقفه عند حده.

مبارك: هاهاهاهاهاهاهاهاهاهاي يا راجل ضحكتني وانا زعلان انت جايلي انا اشوف لك حل للي احنا فيه ( ما كانش اتعذر ولا باع جذر ) عارف كل اللي حصل ده انتوا اللي عملتوه فاكرين نفسكم ملايكة والشعب أول ما تكلموه باسم الدين خلاص هيبقي ليكم سمعا وطاعة.

يا مرسي الدخلة اللي انتو دخلتوها على الشعب المصري دخلة غلط عارف لو انتوا كملتوا باسم الدين بصدق وعلي حق كان زمانكم حاطين الشعب المصري في جيوبكم.

الشعب دا طيب وغلبان ويصبر على الاسية بمزاجه لكن لما حد يضحك عليه يتقلب مارد والنتيجة اهي انا وانت مرميين زي (...........) في السجن.

مرسي: يا اخي ما لوش لازمة الكلام ده دا انا ضيفك وفي زنزانتك منهم لله بديع والشاطر والله لو سابوني براحتي لكنت عملت احلي شغل في البلد دي

مبارك: وانت صغير علشان تمشي ورا كلام غيرك دا انت وصلت مكانة ما فيش بعدها دا انت بقيت رئيس مصر فاهم يعني ايه رئيس مصر قرارات طالعة وقرارات داخلة والقرار دا هارجع فيه والقرار دا عليا اليمين بالتلاته ما انا راجع فيه ايه يا عم انت رئيس دولة ولا واقف في فرن عيش بلدي ؟

مرسي: يا عم كفاية غلط والله العظيم انا ما بيدي حاجة والله جماعة الشوم اللي كنت معاهم هما اللي كانوا بيحكموا مش انا

مبارك: طيب يا ابن الحلال دا انا الشعب حس أن ابني ومراتي بيدخلوا في الحكم عملوا اللي عملوه وما سكتوش غير لما مشوني وطبعا البركة فيكم فما بالك انت دخلت أمة لا اله الا الله معاك في الحكم وعايزهم يسيبوك يا راجل..

دا انت طلعت ندل ندالة يا جدع فاكر لما كنت انا في مستشفى المعادي نايم عيان وجيت انت تزور عساكر كانوا متصابين هناك والله افتكرتك هتعمل واجب وتيجي تبص عليا يا اخي دي زيارة المريض صدقة على فكرة انا مش شمتان فيك لا والله لاني من أول كدبة كدبتوها وانا متوقع اللي حصل كله انا تلاتين سنة رئيس وراجل كبير مش صغير واتخضرمت في السياسة ودا بشهادتكم انتوا.

مرسي: يعني ما فيش فايدة فيك ؟

مبارك: انا لو اعرف حل كنت حليت نفسي من اللي انا فيه المهم انا عايز ادردش معاك في السنة اللي كنت فيها اراجوز

مرسي: ايه اراجوز دي ؟

مبارك: ما تزعلش يا عم لما كنت رئيس حد بردوا يكون رئيس لـ90 مليون يخطب ويقول أهلي وعشيرتي

مرسي: على العموم انا هامشي أنا اتهزأت بما فيه الكفاية ومش هاجيلك تاني

مبارك: يا راجل والله ولا انا عايز اشوفك انا مش عارف ازاي يدخلوا لي ناس وخلاص عايزين يشبهوني اكتر ما انا مشبوه قبل ما تمشي عايز اقولك حاجة مهمة والله ما هاسامحك انت وجماعتك على اللي عملتوه في مصر البلد كانت ماشية، اينعم ماشية بالراحة واحدة واحدة بس معلهش اهي كانت بلد...

انتوا خربتوها اللي عملته في السنين اللي فاتت كلها هدتوه انتوا في السنة دي منك لله حسبنا الله ونعم الوكيل فيكم

مرسي: يا شويش وديني زنزانتي وما تجبنيش هنا تاني دي ناس ما تستاهلش الزيارة ولا السؤال انا غلطان.