ابنة «صباحي»: تحيا مصر

قالت الإعلامية سلمى صباحى، نجلة المرشح الرئاسى، حمدين صباحى: "بالنسبة للانتخابات، معركة انتخابية المفروض تكون منافسة شريفة ومفيهاش تجريح، في فرق كبير بين الانتقاد والتجريح، وقبل ماننتقد أساسا لازم نعرف كويس كل مرشح برنامجه ايه وتاريخه ايه".

وأضافت "سلمى"، في تدوينة لها عبر موقع "فيس بوك"، اليوم الأربعاء: "حملة حمدين عملت ميثاق شرف لكن للأسف كتير مش ملتزمين بيه.. على مدى اليومين اللي فاتوا سمعت وقريت تعليقات كتير فيها تجريح لكلا المرشحين من معارضيهم وكمان تعليقات كتير فيها تحيز مستفز مالوش أساس ولا أسباب من مؤيديهم.. يا جدعان ده مستقبل بلدنا وولادنا ! مش عند!! الله يكرمكو ركزوا جدا في اختياركو والاختيار لازم يكون مبني على معرفة! عشان ع الأقل لما تدافع عن اختيارك تكون عندك أسباب مش بتقول أي كلام تستفز بيه الناس وخلاص!".

واستكملت: "بالنسبة للإعلام، طبيعي أنه لما يكون في اتنين بس مرشحين لرئاسة الجمهورية تتعمل مناظرة كبيرة بينهم على الهواء مباشرة وده حق الشعب المصري عشان كل اللي لسه محتار يقدر يقرر صوته هيكون لمين".

وتابعت: "بالنسبة للمرشحين، هما شخصيات عامة وطبيعي يتعرضوا للانتقاد، لكن أسرهم ذنبهم ايه! بتستفزني جدا تعليقات لناس بتسأل عن بنت السيسي بتشتغل ايه ومتجوزة مين !! أنتو مالكو!! هي قدرها أنها بنت شخصية عامة وأكيد هي فخورة بكده، لكن ده مايديش لحد الحق أنه يتدخل في حياتها احترموا خصوصية الناس أنا جربت الإحساس ده واتعرضت للظلم كتير بسبب إني بنت حمدين صباحي واللي مارضاهوش ليا مارضاهوش لغيري ".
واختتمت: "رجاء كل واحد يركز في المرشح اللي شايفه أفضل لمصر وفي الآخر كلنا عايزين مصلحة بلدنا، وربنا يولي الأصلح، ‫‏هنكمل حلمنا‬ علشان تحيا مصر ".