"أه يا بلد" قصيدة لحسن حجازى
أااااااااااااااه يـا بـلد
فيكى العجايب
والعجب
السبع فيكى يشيل حطب
والحماااار بيشيل دهب
أااااااااااااااه يـا بـلد
أه يا بلد الرشاوى
..والمحسوبية
للى هاوى
..و ناس كتيرة
على القهاوى
م البطالة مالية البلد
أااااااااااااااه يـا بـلد
أه يا بلد القوى بيعيش
والضعيف
مش لاقى لقمة عيش
واللى جاى رايح
ومبكفيش
ولا في حساب في بنوك
ولا في مدد
أااااااااااااااه يـا بـلد
أه يا بلد من سدك العالى
المية فيها المرض
والكهربة مقطعانى
وعالية الفاتورة أوى
والشعب بيعانى
ومليش في الحكومة
لاظهر ولا سند
أااااااااااااااه يـا بـلد
أه يا بلد كسروا الإشارة
وصدَّروا الطرشة.. وطنشوا (الصفَّارة)
وماشى في المخالف
وخالف الإنسان
كإنه كان حالف
وخايف يوقع الحلفان
أه يا بلد الواد في إعدادى
لا بعرف يقرا ولا يكتب
ولا حافظ (بلادى)
فالح يحرك شفايفه
زى باقى زمايله
ويصرخ بعد الطابور وينادى
امتى هتيجى حصة الألعاب
أه يا بلد تعليمنا كله هباب
أه يا بلد العلام العالى
خريج الهندسة
فاتح جنبنا فكهانى
وسيادة المحامى
بنصيبه مهوش راضى
بسرعة جاب وسطته
عيّنه قاضى
أه يا بلد متأخرة
وكمان بترجع
والتخلف في العلالى
والحقيقة بتوجع
واللى متغرّب بعيد
حلف لها تانى مايرجع
عايش يعيش
صاحب كرامة للأبد
أااااااااااااااه يـا بـلد
أه يا بلد حقك عليا واسف
ده الغلط عندى وأنا اللى مش شايف
إنك عظيمة يا بلدى بس أنا خايف
أكون هنا فيكى كمالة عدد
أااااااااااااااه يـا بـلد
