انفراد: الإخوان يلجأون للمشير لإعادتهم للحياة السياسية !
علمت وكالة هريدي نيوز أن قيادات الجماعة الإرهابية يبدو والله أعلم اتجننوا أو أكلوا " تاطورة " _دا نبات بيجنن عارفينوا الصعايدة والفلاحين ممنوع على أهل البندر_ المهم قال إيه كلفوا محمد على بشر اللي الدولة سيباه لحد دلوقتي مش عارف ليه كلفوه يقول للمشير طنطاوي يتكلم مع الفريق السيسي علشان يوصلوا لحل يحفظ لهم ماء الوجه ادام العيال المضللين في القرى علشان الجماعة ما تمتشي.
يقول محرر الوكالة: إن المشير كان هايموت من الضحك على كلام بشر وبحسب مصدرنا الفشار كان الحوار اللي دار بينهم في السطور التالية..
بشر: سيادة المشير احنا عارفين أن السيسي بيسمع كلامك وبيحترمك ما انت اللي لبستنا فيه يا ريت تكلمه.
المشير: أكلمه في إيه، وبعدين دا راجل عرف ازاي يحمي بلده طبقا لرؤيته من واقع المسئولية اللي شالها.
بشر: قوله يخف عن الإخوان ويعتبرهم أخواته دا راجل برضه حافظ القرآن وملتزم وما يرضيهوش يشحططنا.
المشير: من الآخر إيه المطلوب.
بشر: يفرج عن الشاطر وبديع مش مهم مرسي هو أصلا ملوش لازمة في الجماعة.
المشير: القضاء نعمل فيه إيه؟.
بشر: زي ما احنا كنا بنعمل عفو رئاسي يا ريس ما احنا طلعنا ناس محكوم عليها بالإعدام أومال يعني إيه رئيس جمهورية يعني محدش له عنده حاجة.
المشير: والشعب
بشر: الشعب احنا الشعب الجماعة هى اللي بتحرك الشارع تنيمه وتنزله الشوارع بإشارة.
المشير: قصدك إشارة رابعة.
بشر: لأ دي بتاع أردوغان احنا لينا أسلوبنا ويا ريت تبص على "مسيحيون ضد الانقلاب" دي استكمال لـ"صحفيون" و"قضاة" و"معلمون" و"محامون" و"طلاب" و"ألتراس" كلها حركاتنا ضد الانقلاب ولسه البقية تأتي.
المشير: انت جاي تهدد واللا تترجى.
بشر: من ده على ده بس تبقى الجماعة.
المشير: فاكر لما مرسي قعدني في قاعة والسيسي كان بيحلف في قاعة تانية على الهوا.
بشر: فاكر
المشير: كان بمزاجنا الجيش كله أيد واحدة ويا ريت ترجعوا عن حملات التشكيك.
بشر: نرجع بس انت كلمه.
المشير: فات الوقت يا معلم!.
