بالصوت.. "مبارك": الإخوان مسكوا عضمة ومش هيسبوها.. وأردوغان ملوش صاحب
علق الرئيس الأسبق حسني مبارك، على خروج الإخوان للمظاهرات والاعتصام ورفض تولي الجيش السلطة وما نتج عنها من أحداث عنف وتخريب قائلا: "مسكوا عضمة ومش هيسيبوها بالساهل هيضيعوا البلد".
ووفقاً لتسجيلات صوتية انفردت بنشرها الزميلة "اليوم السابع"، يسأل الطبيب الخاص الرئيس الأسبق حول رأيه في خروج الإخوان للمظاهرات في الشارع والاعتصام ورفض تولي الجيش السلطة وما نتج عنها من أحداث عنف وتخريب قائلا: "رأي حضرتك إيه في اللي بيحصل، إنت قولت قبل كده دوول مسكوا عضمة ومش هيسبوها".. يجيب مبارك: "لا لا مش هسيبوها بالساهل هيضيعوا البلد".
ويسأل الطبيب الخاص "موقف أمريكا وأوربا إيه عايزين يرجعوا مرسي ولا إيه بالاتفاق مع الإخوان".. يرد مبارك "أه طبعا فيه مصالح وكمان عايزين ياخدوا جزء من سيناء"..
فيقاطعه الدكتور "اه حضرتك قولتلي الكلام ده قبل كده إنهم عايزين يعملوه معاك".. فيسأل مبارك باستغراب "يعملوا معايا إيه؟!".. يجاوب الطبيب "نتنياهو عرض عليك ياخد جزء من سيناء نفس العرض اللي عرضوا عليك".. يرد مبارك "آه لمح كدة بس رحت هبشته وقولتله انسى الكلام ده".
وقال الرئيس الأسبق، إن رئيس الوزراء التركي رجب طيب أردوغان "ملوش صاحب"، مضيفاً: "قبل كده كان هو وسوريا أصدقاء جدا لكن قلب عليهم"، في إشارة لموقف أردوغان من الرئيس السوري بشار الأسد؛ إذ كانت تركيا تتمتع بعلاقات فريدة مع سوريا إلا أن العلاقات تدهورت بين البلدين في أعقاب قيام الثورة السورية وأصبح أردوغان من أكبر معارضي الأسد.
ويقول طبيب مبارك الخاص: "أردوغان إخوان صرف يعني النهاردة أعلنوا وقف كل العلاقات والاتفاقيات مع مصر".. يسأل مبارك "مين اللي وقفوا".. يجاوب الطبيب "هما الأتراك أعلنوا رغم إن مصر بقيت سوبر ماركت تركي جزء تركي وجزء صيني فأردوغان واقف وقفة شديدة مع مرسي".
يقاطعه مبارك "ده كان بيصدرولنا من غير جمارك أحسن إنهم وقفوا كل حاجة وبعدين أردوغان ده ملوش صاحب قبل كده كان هو وسوريا أصدقاء جدا لكن قلب عليهم".
