يوميات مواطن مخنوق.. حلقة رقم (3)

قاعد قدام التليفزيون قلت لنفسك سلي صيامك.. اشتغلت تقلب القنوات تبص تلاقي أجساد عارية نارية صاروخ. تحط إيديك على عينك وتقول: اللهم إني صايم، وتقول لنفسك: يا ريت نشوفكم بعد العيد.
وسط التسالي تظهر ليك قناة كل إللي فيها أشكالهم غريبة ويقولوا كلام غريب على طول وتفتكر أنها قناة تبع "الشيعة" وأن النهاردة عاشوراء وتشاهد اللطم شغال فيهاعلى الآخر.
تركز شويه تلاقي واحد بيصرخ تفرك عيونك تركز آه هو وتحلف "بالختمة الشريفة" معقولة الدكتور البلتاجي طيب هو بيلطم ليه؟
وشغال يبكي هو إيه إللي حصل؟.
تحاول تركز أكتر لكن مفيش فايدة وفجأة يظهر الدكتور صفوت حجازي. العلامة. والفهامة. والنباهة. والتسخين. والهبل. والعبط على شوية التمثيل على دمعتين تمسايح وكله بتمنه.
تلاقي نفسك من غير ما تحس تكلم نفسك هما "البلتاجي وحجازي" طالعين إعارة تبع الشيعة.
وتسأل نفسك: هو إيه مفيش غيرهم يعرف يبكي ويصوت ولا يمثل.. لا أكيد الموضوع فيه إن.
تحاول إنك تفهم لكن أبدا جالك الغباء كله مرة واحدة هما إيه إللي قلبهم ودخلوا الشيعة.
وتكلم نفسك: آخر حاجة فاكرها أنهم تبع الإخوان هو ينفع يحول من الإخوان للشيعة عادي كده ولا لازم يقعد له أربع سنين شيعة تحت التدريب وهما في سنة أولى تدريب تضرب كف بكف وتقول والله جايز.
تفك الطلاسم عينك تروح للشعار بتاع القناة
تلاقي نفسك من غير ما تحس وتبكي والنعمة الشريفة هي آه والله هي قناة الخنزيرة قصدك الجزيرة لا هي الحقيرة لا قناة شخللة عايز تخريب وتهليب وفتنة وحرب أهلية شخلل جيبك يا معلم وإحنا تحت أمرك.
تفرك عيونك تاني وتالت ورابع هي دي قناة..........لا مستحيل وتضرب وشك كام قلم نضيف.
وتصرخ فوق يا غبي دى قناة الحقيرة عايزة - حسب تعليمات أسيادها- تحولنا إلى سوريا التانية والقطيع ماشي؛ لأنهم زملاء مهنة خريجو نفس الجامعة.
جامعة الخيانة والفتنة والبيع.. بيع مين وليه مش مهم.. المهم تدفع كام ولازم يبقى ملايين من الورق الأخضر.
تستغفر ربنا. اللهم إني صايم وتمنع نفسك من السباب واللعن بصعوبة، وتقول في نفسك: أقوم أولع في نفسي أحسن وأرتاح.
وتكرر السؤال: هما مين دول تبص تلاقي لسان طوله 1000 متر يقولك ولسه إنت شوفت حاجة.
من غير ما تحس بطنك تكركب، وركبك تخبط في بعض، وإيديك تترعش، وعرق نازل طالع، ولسان ناشف، وأسنان تخبط في بعض، وتصرخ هما عايزين من مصر إيه عايزن من الشعب إيه وتصرخ صرخة يسمعها كل سكان مصر وتقول:
أنا مخنوققققققققققققققققققققققققققققققققق!.