لو

واحد أخينا من يومين جاوب شوية أسئلة
عمال بيعمل مندبة صعبان عليه المشكلة
طبعًا بيفتى من زمان حل لنا كل المعضلة
لو كنت أنا اللى مكان فلان ح أعمل عمايل مذهلة
كنتم تشوفوا وتسمعوا كل الأمور متسهلة
و لا فيش آلام ولا فيش زحام ولا حاجة تبقى مكعبلة
و الأكل كان يبقى ببلاش ولا حاجة تبقى مشعللة
و خضار ولحمة بالهبل والفاكهة خدها مِشَكّلة
و ح تنسوا أيامكم عشان أيامى هي المقبلة
و لو جابونى من الليلة دى فرقعت زى القنبلة
في لحظة واحدة تتوزن كفتها شوف مستعدلة
و الناس تقول فيّ الخطب والسمعة تبقى مطبلة
وصورتى تلمحها ولا أجدعها واحدة ممثلة
و أمسك وأتبت في الكراسى رجلىّ تبقى مدلدلة
و بعد ساعة من الحديث لسه علينا التكملة

عمّال يطول والسلام والكلمة طالعة مجلجلة
يا اخواننا خفوا في الملام دماغتنا مش متحملة
و زهقنا من كره وخصام ادامنا بعض الامثلة
صدعنا من كتر الكلام بصوا البلاوى متلتلة
لا مؤاخذة يا اخواننا إذن ناسكم أكيد مستهبلة