رد جريء من النجم عمرو يوسف على إطلالة ويجز في السعودية | فيديو

علق الفنان عمرو يوسف، على إطلالة مطرب الراب ويجز الغريبة خلال حفله في موسم الرياض بالمملكة العربية السعودية.
 

إطلالة ويجز الغريبة

وقال عمرو يوسف خلال الجزء الثاني من لقائه ببرنامج "حبر سري" الذي تقدمه الإعلامية أسما إبراهيم بقناة "القاهرة والناس": "إطلالة ويجز أنا ما البسهاش بس هو حر يلبس اللي هو عايز، وأكيد إطلالته ما عجبتنيش وما حبتهاش ومستحيل ألبسها".
 

مزيكا راب ويجز

وتابع: "ويجز شاب ناجح جدًّا وبحب مزيكته ولما مثل لقيته ممثل شاطر جدًّا، ومش هسيب غناه الجميل واختياره للمزيكا حلو فمش هسيب حاجاته الحلوة وأركز على الشورت".

موهبة ويجز وسمعة مصر

ولفت: "مزيكا ويجز مختلفة عن الراب، وهو بيعمل شغل خارج الصندوق، ولكن هو مش تريند على الفاضي هو عنده موهبة وشاطر وعمل حركة تريند ولكن المصيبة في الناس اللي ما عندهاش حاجة وبتعمل تريند، ومش شورت ويجز هو اللي هيقلل من قيمة وسمعة مصر، ويلبس اللي هو عايزه ما دام بيقدم لنا فن حلو ونحتضنه ونحتفي بيه وابعدوا مصر عن الموضوع".

وكشف الفنان عمرو يوسف، في نفس اللقاء، لأول مرة الأسباب الحقيقية لإيقاف مسلسل "الملك" الذي كان من المقرر عرضه في رمضان الماضي.

كواليس إيقاف مسلسل الملك

وقال عمرو يوسف: "في عز الدوشة عن وقف عرض مسلسل الملك، فضلت إنى ماتكلمش ولا أصرح بأي تعليق لإن التجويد كان زيادة عن اللزوم وآراء من الشرق والغرب وفي وقت المشاكل الكلام بيتحول الي لعبة اللوم، أنا كممثل اطلع ألوم المخرج والمخرج يطلع يلوم الشركة المنتجة وهنبتدي نلوم في بعض، في حين إنه محدش عمل خطأ بقصد والدليل علي كده ان نفس شركة الإنتاج لو كان المخرج مش كويس مكنوش بيشتغلوا معاه مسلسل كبير السنة دي زي "جزيرة غمام" ومكنش الشركة اتعاقدت معايا تاني".

شائعة عمرو يوسف الكارثية

وتابع:"طلع عليا شائعات كان فيها لغط ومن بينها شائعة كارثية انى مرضتش احلق دقني واعطت ايحاء خاطيء تماما عني وعن فهمي للشغلانة وانا راجل محترف وتتلمذت علي ايد راجل من قمة المحترفين وهو الفنان الراحل نور الشريف ومفيش حاجة اسمها مش راضي أحلق دقني".

شخصية عمرو يوسف

وأكمل: "الشخصية بتاعتي في المسلسل بتبقى من غير دقن ولا شعر في الحلقات الأخيرة، ودراميا اخدنا المسلسل من رواية كفاح طيبة للأديب العالمي نجيب محفوظ، والرواية فيها دراما وخيال المؤلف واحنا اخدنا خيال نجيب محفوظ وحطينا عليه خيال الكتاب الشاطرين جدا شيرين دياب ومحمد دياب وخالد دياب، وعملنا مسلسل 30 حلقة اعتقد اننا لما قرأناه انبسطنا بيه كلنا جدا من مخرج وشركة انتاج وممثلين".

برومو مسلسل الملك

ولفت:"لما نزل برومو المسلسل حصل بعض الاعتراضات وناس كتير رأت أن فيه أخطاء كتيرة فيما يتعلق بشكل التاج أو الدقن، ويقال إن ده مكنش موجود ساعتها فالناس معجبهاش الموضوع فشركة الإنتاج قررت توقف المسلسل، وانا بالنسبة لي بقدم المنتج للمشاهد".

الملك أحمس 

وأكمل:"احنا مكناش بنأرخ للملك أحمس ولكن كنا بنعمل رواية نجيب محفوظ، وكل الناس في الوسط كانوا معايا و80 نجم من نجوم مصر عملولي هاشتاج فيه دعم".

مفاجأة عن تصوير مسلسل الملك

وأشار: "نفسيًّا كنت متضايق جدا لإني بذلت مجهود كبير جدا وكان فاضلنا 10 أيام ونخلص المسلسل، وخلصنا تقريبا المسلسل، وأحبطت وحسيت ان مجهودي الكبير راح في الهوا، ونفسيا كنت تعبان جدا، انا مش ضعيف وبحب انى احارب بس في المسلسل ده كنا حاسين اننا عاملين حاجة كبيرة وضخمة ولذلك لما العمل اتوقف كنا محبطين جدا".

إحباط عمرو يوسف

وأردف:"زعلان علي مجهودي ومجهود الناس اللى كانت معايا، وكنا بنصور في الفيوم والمنوفية، وتعرضنا لمشقة كبيرة لأننا كنا بنصور في أرض زراعية في عز التلج وبنبدأ تصوير من 5 الفجر، والموضوع كان صعب جدا علي اللى قدام الكاميرا واللى ورا الكاميرا".

عمرو يوسف: اللي عمله محمد رمضان غريب عن تربيتي | فيديو

عمرو يوسف يدافع عن منى زكي في "أصحاب ولا أعز" | فيديو

عرض مسلسل الملك

وتابع:"أتمنى يكون فيه أمل والمسلسل يشوف النور بعد المجهود الكبير اللى عملناه، وانا مش ببدأ المسلسل إني ملك لكن ببدأ إنى أنا من عامة الناس ومتخفي واللى خالص هما الكهنة والملوك والمصري عموما حصل في فترة انتشر فيها الحشرات والأمراض زي القمل فالناس كانت بتحلق شعر جسمها حتى الستات، والتفاصيل ممكن لم نوفق فيها ولكن قدمنا كل ما لدينا".