يوميات رئيس.. حلقة رقم (2).. الريس مخضوض
مدير مكتبه: مالك يا ريس بعد الشر عليك وشك أصفر ومخضوض ليه فيه جديد؟!
الريس: عاجبك اللي بيحصل ده الواحد من الخوف جاله إسهال.
مدير مكتبه: ياريس متخافش احنا معاك وبعدين الشعب كله في البيت يعني لا مؤاخذة انسي ياريس يوم 30 خالص
الريس: أنت فاهم غلط يا حبيبي البلتاجي والعريان عاملين فيها رجالة والشعب خلاص كرهني كرهني
مدير مكتبه: أنا مش عارف اعمل معاك ايه أنا تعبت بصراحة ومش هاين عليا اسيبك وفي نفس الوقت أنت مرعوب وشك أصفر ومخضوض على الفاضي
الريس بعد أن يعتدل في قعدته: يا حبيبي ما تيجي ناخدها من قصيرها ونخلع ونخلي الشعب يولع من الغيظ ونقول يا فكيك إيه رأيك.
مدير مكتبه يضرب كفا بكف: ياريس أنت جبان قوي كده.
الريس يصرخ: ياعم أنا عايز أربي عيالي افهم حرام عليكم مستقبلي ضاع منكم لله.
مدير مكتبه:ا سمع ياريس فيه ناس كتيرة معاك متخافش
الريس: ماهو اللي تعابني وتاعب أعصابي إني حاسس انكم هتبيعوني لو حد دفع ليكم أكتر.
مدير مكتبه: مش للدرجة دى أنت إخواني قديم وفاهم كويس ولا تفريط فيك أبدا.
الريس: أنت طيب ومش فاهم حاجه يابني الشاطر ممكن يبيع أي حد في ثواني وأنت عارفه كويس المهم عنده المصلحة.
مدير مكتبه: قصدك مصلحة الجماعة
الريس: ده كلام بنضحك بيه على السذج اللي زيك
مدير مكتبه: يعني احنا اتخدعنا زي ما قال المرحوم حسن الاسمر "اتخدعنا أنا وأنت يا قلبي اتخدعنا "
الريس يجري على الحمام: أنا حاسس إن الإسهال متحالف مع حركة تمرد
مدير مكتبه: مش للدرجة دى ياريس أنت بس اللي خايف زيادة عن اللزوم خد الموضوع طبيعي خالص هتحس بالراحة.
الريس: أنا كلمت المرشد امبارح وقال كلمه واحدة اوعي تخاف احنا معاك.
مدير مكتبه: طيب ما دي حاجه كويسه جدا أنت عايز ايه اكتر من كده.
الريس يلطم: ماهو ده اللي راعبني..أيام مبارك كان يقول اوعي تخافو ابص ألاقي بتوع أمن الدولة على الباب وكلنا نروح المعتقل مع بعض وهو لا.
مدير مكتبه: ياريس ده كان زمان
الريس ضاحكا: شكلها هترجع تاني ونرجع تاني للمعتقل صحبة
مدير مكتبه: يانهار أسود يعني هنرجع المعتقل تاني بعد العز ده كله وبعد عيشة القصور والهيلمان ده كله نرجع _ويبكي_ لا دا حرام حرام.............
الريس:عرفت يا حبيبي ويجري ناحية الحمام وخلفه مدير مكتبه وكل واحد فيهم عايز يلحق الحمام قبل التانييييييييييييييييييي
