رئيس التحرير
عصام كامل
Advertisements
Advertisements
Advertisements

إسماعيل ياسين في زمن الكورونا: إننى أكاد أشعر بالاكتئاب

صورة أرشيفية
صورة أرشيفية

آه يانى يا سمعمع ياابو الشلاضيم.. ما كل هذا الاكتئاب.. والنبى حد يلحقنى بقزازة نشادر تفوقنى.. فلقد أصبحنا في زمن الكورونا نرى العجب العجاب.. كل الأخبار توحى بالخطر.. كلنا بقينا أطباء ومحللين وحاجة كده تملأ العين.. والنبى ياخوانا بلاش جو الاكتئاب اللى احنا فيه ده.. فالعالم كله به كورونا.. وليست مخلوقة علشان خاطر اللى جابونا

آه والنبى ياخويا منك له لها لها.. بلاش نترقب المصايب علشان ننشرها في "بوست" لن يعود علينا إلا بحرق الدم وارتفاع الضغط ونقص المناعة.. دا إحنا كلنا في عرض فسفوسة مناعة نقابل بيها الكورونا.. اترزعوا في البيت بقا وانتم ساكتين وبالكمامات متلحفين.. وعن بعضكم متباعدين.. حتى ننجوا أجمعين

وانت ياخويا يا بتاع الإعلام.. ارجوك كفاية هرى ونصايح كلها أي كلام.. والنبى ياخويا احنا عايزين إعلام زى بتاع زمان.. إعلام يكشف.. إعلام يحقق.. إعلام يناقش.. مش عايزين اعلام الرغى بالساعات قدام الشاشات وكأنك عالم في كل المجالات.. ياخى جاتك ستين ألف نيلة انت واللى سماك إعلامي.. فأنا بسببكم أكاد أشعر بالإكتئاب

كفايانا بقى إعلام متطرف واحنا في وقت محتاجين نكون كلنا في كفة واحدة حتى نستطيع الوقف معا في وجه هذا الوباء الذي لا هوادة عنده ولا رحمة.. دا احنا ربنا رزقنا بشوية إعلاميين بيحبوا ويكرهوا وكأنهم قاعدين في بيت أبو اللى جاب أبوهم

والنبى كفاية علينا الحظر اللى إحنا فيه.. دا الواحد مش مستمتع بأى حاجة. لا أكل ولا لبس ولا خروج ولا حتى جنس.. وبرضو مستحملين بقالنا شهور وبنقول يارب الوباء يغور وينقشع إلى حيث لا رجعة.. فبلاش والنبى هذا الاكتئاب اللى الناس بتصدرهو لنا.. وتعالوا معا نكون إيجابيين.. فلا الحكومة عدو للشعب ولا الشعب عدو للحكومة.. والكورونا هو عدونا اجمعين.. وينتظرنا اجمعين.. شعب وحكومة وكل البنى آدمين.. فياريت نسيب الحكومة تشتغل وإحنا برضو نشتغل معاها.. بس نشتغل على أنفسنا ونقيها ونعزلها عن كل شر.. وليس هناك أشر من الكورونا.. وكفايا بقا عليكو كدا.. السلامو عليكوووووووووو.

Advertisements
الجريدة الرسمية