صفحة "أنا إخوان أنا مقطف بودان" تنتقد أهم مبررات عدم النزول في 30 / 6

خايف تنزل في 30-6 علشان نظام الإخوان جامد؟ ولا علشان خايف تتعور؟ ولا ممكن علشان الحر.. كل هذه الأسئلة أجابتها صفحة " أنا إخوان أنا مقطف بودان " للرد على الذين لا ينوون المشاركة في 30-6، "فيتو كافيه" رصدت ما قالته الصفحة الشهيرة..
مش عاوز تنزل ٣٠ يونيو عشان لغاية دلوقتي مقتنع أن نظام الإخوان جامد والمفروض يأخد (لا مؤاخذة) فرصته.. عادي جدا طب ما في ناس لغاية دلوقتي مقتنعة أن الواحد ممكن يشوف مين زار بروفايله. 

مش عاوز تنزل عشان خايف من الأحداث لتتعور وتجيلك واوا... عادي جدا في أي مجتمع في الإنسان الحر اللي مستعد يضحي عشان كرامته ومبادئه وفي الإنسان الجبان التافه اللي معندوش لا كرامة ولا مبادئ أصلا، بناقص راجل!!

مش عاوز تنزل عشان مش في دماغك ولا فارقة معاك... عادي جدا مش كلنا عندنا دم وبنحس! بس انت كنت حتحس لو أبوك كان مات وحقه مجاش أو أخوك مخطوف ومرجعش لغاية دلوقتي ولا أختك اتضربت في الشارع على إيد بلطجية النظام!

والمبرر الأقوى!! مش عاوز تنزل عشان بيقولوا الجو حيبقي حر وخايف من التسلخات... في ديه عندك حق... أصل مش كل الناس عندها قطونيل. 

بص بقى، مش عاوز تنزل لأي أسباب تافهة تانية أو لأي مبررات مريضة بتضحك بيها على نفسك، انت حر، بس صدقني بيك أو من غيرك إن شاء الله يوم ٣٠ -٦ حينجح... أصل في أشكال كده متستحقش أساسا إنها تاخد شرف المشاركة في يوم زي ده!