ساخرون.. إسماعيل ياسين في الفلانتين: حُب إيه اللي إنت جاي تقول عليه!
آه يا خراب بيتك يا سمعمع.. ويا ويلتاه من ذاك الذي سأراه.. الولية مراتى بقالها كام يوم بتدحلب نحوي وأنا معرفش ليه وحصل إيه وماذا تنتوى.. كل شوية تزغدنى وتقولى: ياترى ياسُمعة يا حبيبى محضر لى إيه يوم الخميس.. ومرة تانية تقولى: اوعاك تنسى الخميس.. وهكذا حالها كلما ترى شلاضيمى.. وأنا أقول لنفسى إيه الولية المجنونة دى.
أتاريه قال إيه "عيد الحب" يوم الخميس.. طب شى لله والنبى يا سيدنا الفالنتين يا ساكن قلوب الدباديب.. طب يعنى أعمل إيه أنا في مثل هذه "المناسبتو".. وكيف سأخلص من هذه "الدوشتو".. الولية من بعد ليلة الدخلة ماقلتليش كلمة بحبك، وقال إيه جايه بعد عشرين سنه عايزة هدية عيد الحب.. حب إيه اللى أنتى جاية تقولى عليه.. هو إنتى عارفة معنى الحب إيه؟!
الستات بيقلدوا بعض على فيس بوك ونازلين تنقير على أنفخ الرجالة قال إيه لازم الدبدوب الأحمر ييجي وإلا فلا طب ياأختي فلا وألف فلا.. "وإنشاء الله حتى تفلفلي فلفلة".. ده أرخص دبدوب في السوق بـ500 جنيه.. يعني لو عايز دبدوب عليه القيمة يبقى لازم يكون معاى 1500 جنيه.. كل جنيه ينطح جنيه.
الولية محسسانى إن الحب بيدلدق منها بقى لها يومين.. ومافيش زّغر ولا نّطر ولا زعيق كالعادة.. طب والنبى ده شكل ينحب؟!.. بتحبى لحمة راس يا ولية يا لولبية؟!.. كل ده علشان تقولى لصاحبتك عالفيس إن جوزك الأهبل جابلك دبدوب أحمر بنص راتبه وتنشرى صورة الدبدوب على صفحتك؟
يا ناس حد يزرر لى بوقى علشان اسكت.. ده إحنا شعب بنقول عشانا عليك يارب.. يا وليه ده الدبدوب أحلى منك أصلا.. طب لو راجلة انشرى صورتك مع الدبدوب وانتى هتشوفى رد الفعل.. طب ورحمة بُقى ما هتلاقى لايك يوحد ربنا
دى الحكومة لو عرفت إننا بنجيب دباديب للنسوان هتغلى علينا كل حاجة.. ومش هنلاقى نتعشى يوم الخميس أصلا
طب والنبى دعونى أنقشع في سلام حتى لا يطول الكلام.. سلامو عليكوووووووووووو
