«كلنا بنبوس جبينك» قصيدة لـ«على فرج»

ياللي واقف في العلالي رافع جبينك
ياللي في الحق دايما عالي صوتك
ياللي في تاريخك بتصنع شرفك بإيدك
كلنا بنبوس جبينك

ياللي شايل هم بلدك فوق كتافك
ياللي بتبني بالعرق وتعمر بلادك
ياللي بتخليها أجمل لأجل ولادك
كلنا بنبوس جبينك

ياللي عارف حقها دايما عليك
ياللي بتخاف عليها وشايلها في عينيك
ياللي كل شبر منها بتعشقه وغالي عليك
كلنا بنبوس جبينك

ياللي علشانها بتبني وتشيد مدارس
ياللي همك يكون إبنك فاهم ودارس
بالعلم يكبر ويكمل مشوار جدودك
كلنا بنبوس جبينك

ياللي بالإخلاص بتقوم بدورك
بتزرع أرضك وتاكل من زرع إيدك
وتبني مصانعك وتثبت للعالم وجودك
تعلِي بلادك وتعمر أرض جدودك
كلنا بنبوس جبينك

ياللي كل الدنيا تعرف برضه قيمتك
ياللي وقت الشدة ثابت زي هرمك
ياللي الشهامة والكرم عنوان رجولتك
كلنا بنبوس جبينك

ياللي وجودك مثال للتضحية وَيَا الشهامة
وينضرب بيك المثل في الشجاعة والزعامة
وإنت حارس أمنها ليوم القيامة
وكمان عشانها نزفت دم ياما
كلنا بنبوس جبينك

يا اللي في وجه الأعادي واقف وصامد
ياللي في كل أزمة شديد وجامد
ياللي مؤمن بربك ولفضله حامد
كلنا بنبوس جبينك