وليد منصور يرد على المشككين في تكريم تامر حسني بالمسرح الصيني

وجه المنتج وليد منصور رسالة لكل المشككين في تكريم النجم تامر حسني بالمسرح الصيني في أمريكا عبر صفحته الشخصية على موقع التواصل الاجتماعي "فيس بوك".

وكتب وليد «لكل المشككين في التكريم العالمي للفنان المصري تامر حسني بجد مستغرب من الكلام اللي بيتقال ده أحب أقول لو اللي بيتكلم مجنون المستمع عاقل ولا إحساسي الشخصية من في حملة ضده وضد نجاح الفيلم الغير مسبوق خارجيا والتكريم وحصوله على بصمة الأيدي والأرجل وسط عمالقة النجوم في الخارج والتشكيك في الاحتفال الكبير اللي اتعمل وإن أول فنان عربي يحصل عليها وإن التكريم ده وهمي أو غش أو أو طب فين البوليس».

وأضاف « لو المسألة عادية وسهلة كده كان أي فنان راح اشتراها أو أي مشهور طب لو تكريم ده والحدث مش مظبوط هل من المعقول كل الناس اللي راحت دي وعددها تقريبا ٢٠٠٠ شخص في داخل وخارج كانوا وهم».

وتابع «أنا استغرابي بس لما حد عندنا ينجح في حاجة ناس تعمل عبيطة وتتجاهل عكس بره لو ده حصل مع فنان من عندهم كانت الدنيا انقلبت والبلد تقف تدعمه وملحوظة التكريم حصل جوه المسرح علشان عرض الفيلم جوه وغناء تامر عكس لو تكريم ده حصل مع فنان أجنبي هيكون في شارع لكثرة جمهوره علشان أجنبي».

وتساءل «هل لو تكريم ده وهمي كده أو حاجة بسيطة هل كان السفير والقنصلية والعمدة عادي كده يحضروا حاجة كده
أنا بتكلم انهارده علشان لما فنان عندنا ينجح لازم نقف ونشجعه ونقوله أحسنت وكل شهر كده نلاقي نجم عندنا مشرفنا بره وندعمهم مش نخترع حاجات وتشكيك مضحك وناس اللي ظهرت وبتكلم عن أزمة تامر في الجيش مع إنه كان ضحية بس أتصالح مع البلد وجبوه غني في مناسبات قومية للبلد».

وأضاف «نفسي نركز ونشتغل وننجح وكل حد يركز في كده أخيرًا مبروك تامر حسني على الحدث الكبير ده مبروك تصبح على خير
ومبروك عليك كل نجاح ده علشان تستحقه أنت مش بتنام ومبروك عليك كل ده ولا تلتفت للحاقدين».

وكانت البعض شكك في فبركة تامر حسني للتكريم في المسرح الصيني في الولايات المتحدة وهو الأمر الذي نفاه وليد وقرر تامر عدم الرد عليه.