كنباوى وكنباوية.. حلقة رقم (42) .. مطالب شعبية بالإفراج عن مبارك وحبس مرسى!!

كنباوية تفترش أرض الفسحة جالسة أمام طبلية وضعت عليها عجين ومناقيش ومكنة لصنع البسكويت وبجوارها صاجات فرن، يدخل كنباوى من باب الشقه فيراها فينزعج ويندهش.
كنباوى : كعك وبسكوت ؟ ! هو العيد هل ؟
كنباوية : لأ يا سيدى لسه بدرى على العيد بس ده من فرحتى ببراءه مبارك من تهمة قتل المتظاهرين وعقبال باقى التهم المهم بس النائب العام الإخوانى ده يبعد عنه ويسيبه فى حاله وما يلفقش قضايا تانيه له بتسليط من مرسى والإخوان.
كنباوى : انتى فعلا فرحانه ياكنباوية ببرائه مبارك؟
كنباوية : أيوه فرحانة شماته فى مرسى والإخوان وكمان الراجل كبير وعيان بلاش يتمرمط فى أخر أيامه اللى حصل حصل واللى مات مات مش حيرجع تانى ويمكن يكون الراجل بريء فعلا من قتل المتظاهرين.
كنباوى : اهه احنا كده يا مصريين طيبين وقلبنا نى ورهيف وبيصعب علينا نأذى حتى اللى اذانا ودايما نقول المسامح كريم ويا بخت من قدر وعفى وسامح.
كنباوية : ايوه يا خويا المسامح كريم .
كنباوى : ايه أخر الأخبار عندك ؟
كنباوية : أخر الأخبار إنه تقريبا فى سفريه مرسى الأخيرة للدوحه اتفق مع رجال الأعمال والمستثمرين القطريين أنه يعمل لهم منطقه صناعية هنا شمال غرب خليج السويس وفى اجتماع قنديل الأخير بالوزراء لوح وأشار بكده وطلب منهم دراسة المشروع على أن تكون المنطقه ذات طبيعة خاصة وما حدش فاهم يعنى ايه طبيعة خاصة ولا حتى أنا.
كنباوى : وايه تانى عندك فى نشرة الأخبار ياكنباوية ؟
كنباوية : مرتضى منصور.
كنباوى :ماله مرتضى ؟ رفع قضية تانى على باسم يوسف ؟
كنباوية : هو كان رفع أولانى علشان يرفع تانى، ده هو وباسم يوسف بقيو سمنه على عسل.
كنباوى : ما تغلبينيش معاكى وقولى عمل ايه مرتضى منصور ؟
كنباوية : بيطالب بحبس مرسى وبيقول إنه هربان من السجن هو 33 قيادى من قيادات الإخوان يعنى يقع تحت طائلة القانون اللى بيقول إن الهربان من السجن عقوبته تتراوح من 6 شهور لسبع سنوات حسب تقدير المحكمة وأنه لازم يتحاسب لأننا فى دولة قانون ولا مرسى علشان بقى رئيس جمهورية حيبقى فوق القانون .
كنباوى : وقال ايه تانى سى مرتضى ؟
كنباوية : قال اسألوا أمن الدولة والمخابرات والمشير طنطاوى هو مرسى كان محبوس ليه ؟ وكانت تهمته ايه الشعب لازم يعرف ولازم يكون فيه شفافية ده العدل والحق اللى لازم يمشى على الناس كلها ومفيش فرق بين أمير وغفير ولا رئيس جمهورية.
كنباوى : يسلم قوله وفمه مرتضى منصور الراجل ده رغم أنه ساعات بيبقى مزعج لكن تحسى أنه راجل حقانى وما بيخافش من حد راجل جدع بصحيح.
كنباوية : وأجدع منه مفيش بس مين اللى حيقدر يحبس مرسى ولا يطلب بمحاكمته ؟
كنباوى : الرأى العام والصحافة والإعلام.
كنباويه: ومين حيسمع لهم والنائب الإخوانى ده لسه موجود ؟
كنباوى : بكره يغور فى داهية والحال ينصلح .
كنباوية : يسمع منك ربنا ياكنباوى.
كنباوى : حيسمع لأننا مظلومين مع مرسى والإخوان وربنا بيسمع دايما دعوة المظلوم واحنا بقالنا 9 شهور مظلومين مع مرسى والإخوان وفاض بينا خلاص فاض بينا.
كنباوية : سبنى اخلص اللى فى ايدى علشان أقوم أحضر الأكل عقبال ما تغير هدومك وتاخد دش أكون خلصت اللى فى ايديا وأكون قمت حضرتلك الغدا .
كنباوى : شدى حيلك ومصلحة إنك عملتى كعك وبسكوت أنا من كام يوم ونفسى رايحاله اهه كده الواحد يدعى لمبارك ان ربنا يفك سجنه
كنباوية : يارب يا كنباوى يارب وزى ما يكون قلبى حاسس إن أنت نفسك فى الكعك والبسكوت وادينى عملتهولك اصلى مش بحب نفسك تروح لحاجه إلا واعملهالك من عنيا.
كنباوى : تسلملى عنيكى وايديكى ياكنباوية
كنباوية : ةتسلملى انت كمان يامكفينى وساترنى ومالى عليا حياتى