حلب بتموت.. «قصيدة»
مكالمة تليفونية بين زوج وزوجته
#حلب_بتموت
هجيب عيش للولاد حاضر
وأجيب لانشون وفول وبريل
أكيد ماسمعتش الجملة
أنا باقولك #حلب_بتموت
أنا تعبان ومش قادر
روتين اليوم ده شيء بيذل
فخلي المكوة دى لبكرة
وحطى قميصي ع الأوكرة
وما اتغدتش على فكرة
فسيبى عشايا في الأوضة
باقولك إيه #حلب_بتموت
هاعدي أكيد على الجزار
وهيشككني بعد هزار
مرتب شهري طبعا طار
وعادي الفقر بقى موضة
يا راجل مرة اسمعنى
#حلب_بتموت #حلب_بتموت
حبيبتى العيد خلاص قرب
فشيلى كام جنيه على جنب
عشان لبس الولاد طيب
دى أكتر حاجة تإذى القلب
لو أشعر إنى مش قادر
أفرحهم في يوم العيد
مافيش سلفة ولا كادر
ولكن شاطرة إنتى أكيد
يا راجل عيد ؟!،، لابد أعيد عشان تسمع
#حلب_بتموت.. #حلب_بتموت
لعلمك يعنى أنا سامع
وعارف إنها بتموت
ولكن قلبى أنا ضايع
ومليان خوف ومليان موت
بأخاف على بكرة من بكرة
وأخاف برضه كمان م الجى
أنا قرفان على فكرة
وميت بس بعمل حى
عشان خاطرك وخاطر البيت
أنا باعمل كإنى عبيط
ولو عوزتم قزازتين زيت
باجيبهم بس بالتقسيط
قرارى شيء ماهوش ملكى
في وشى للأسف 100 سد
حزين بارسم في دور هزلى
باخاف لأبكى فبعمل جد
وباعمل إنى مش سامعك
عشان خايف عليكى بجد
كلامى يكون سبب دمعك
فبقلب سبتى عادى لحد
وأحور في الكلام وأدور
وباضحك بس مش مبسوط
عشان عارف هييجى الدور
على كل العرب وتموت
#حلب_بتموت عشان احنا كمان بنموت
فهمتى يا ستى إيه المقصود ؟!!
هسيب الأكل في الأوضة
وأسيب المكوة ع الأوكرة
حبيبى يا ريت ما تتأخرش
ونام بدرى عشان بكرة
تروح الشغل م النجمة
حبيبى ربنا يعينك.......
حبيبتى بجد مش سامعة ؟!!
اأقولك إيه !!
#حلب_بتموت..
