«أم العيال» قصيدة للشاعر أبوالحسن حسن عكاشة
كتر خيرها دي أم عيال
ماشية وشايلة وراها جبال
طالعة تلف فـعز الحرّ
جـارَّه حملوها وقلبي انجرّ
لُقمة عيش وما ليها مفرّ
وعرق نازل مابيتشـال
***
علشان عايزه تربي عيال
لفت كونها آلاف أميال
لون الطيبة في قلب حبيبة
قلبي بدمعُه عليها آهو سـال
***
أكبر فرحة ف يومها تبيع
علشان تطعم طفل رضيع
جبنة وسمنة ودي المواضيع
اللي بتبني عليها آمــــال
***
نادر لما تعيش أفراح
خايفة ف بكرة تلاقي جراح
أكبر حلم تنام ترتاح
وإن عيالها بأحسن حـــال
***
وكتَّر خيرها دي أم عيال
ماشية وشايله وراها جبال
