بالصور.. الغضب يجتاح النشطاء لغرق الإسكندرية في الأمطار.. عامر: كابل ضغط عالي وقع في بركة كهرب 8 أشخاص..دونا: حد يصحي المحافظ..المصراوية: واحد جاب السنارة وقاعد يصطاد..عبده:«المحافظ راح يرسم تاتو

حالة من الغضب انتابت نشطاء مواقع التواصل الاجتماعي "فيس بوك" و"تويتر" بعد غرق الإسكندرية في مياه الأمطار، ودشن النشطاء هاشتاجا  على تويتر بعنوان "الإسكندرية"، ليعبروا فيه عن سخطهم لما يحدث في الإسكندرية، وخاصة من المحافظ، مؤكدين أنه اهتم بالمترو على حساب البنية التحتية للإسكندرية، التي انهارت بمجرد سقوط المطر لعدة ساعات، وتسببت في وفاة 8 أشخاص نتيجة سقوط كابل كهرباء في مياه الأمطار، ما دعاهم لتدشين هاشتاج آخر بعنوان "المسيري لازم يمشي".

فين المحافظ

قالت رانيا نوح: "ده طوب مش تلج إسكندرية".

وأضاف أد سكرين شوت: "فين المحافظ فين عربيات شفط المياه؟ إسكندرية نفق كليوباترا".

وتابعت أماني: "نفق كليوباترا إسكندرية ينافس تفريعة قناة السويس الجديدة".

وقالت ليلي نصر: "ده بقى الكورنيش يعنى الطريق ده لو وقف إسكندرية كلها تقف جميل المحافظ بتاعنا اوى ممكن يعملنا ترام للشتا.. إسكندرية".

وأضافت المصراوية: "واحد جاب السنارة وقاعد يصطاد والتاني جه وقف جنبه بسنارته.. إسكندرية يا ناس".

المطر كارثة

وقالت نور: "إسكندرية.. إسكندرية مفيهاش صرف يا دولة بتحول الخير والمطر لكارثة".
وسرد عامر الخولي الحكاية قائلًا: "أنا في شارع محرم بك دلوقتي ده اللي فيه الترام... في وسط الشتا وبِرَك المياه الموجودة.. كابل ضغط عالي وقع في بركة من البرك دي وكهرب تمن بني آدمين.. أربعة منهم اتأكد موتهم.. الأربعة منهم اتنين طلبة مدارس الإسعاف جت بس المسعف اللي حاول يشد الناس اتكهرب معاهم.. بلغنا وطلبنا قطع الكهربا عن الخط ده.. بس الرد كان أن معندهمش صلاحيات يعملوا كده!! كل ده بسبب ضعف البنية التحتية وإن إسكندرية شوية شتا بيغرقوها..بس مش مهم البنية التحتية.. خلينا نصرف عالترام الزرقا.. الترام أهم بردو حسبنا الله ونعم الوكيل".

وأضاف المنسي:"محافظ إسكندرية بيفتتح فيه كل يومين ترام جديد وأنفاقها وشوارعها غرقانة! حد يقوله إن الشوارع والترام مش ووتر برووف".

وقال دونا روميو: "حد يصحي المحافظ يقوله البلد بتغرق.. إسكندرية".

في شبر ميه

وعلق مجدي كامل: "إسكندرية غرقت في شبر ميه من شتا ساعات..بس فين الدولة.. فين المليارات اللي بتتصرف ع الطرق.. إسكندرية.. دي دولة؟ ده شط إسكندرية اللي كان زمان شط الهوا دلوقتي بقي شط غير صالح للاستهلاك الآدمي..
 
نجيب بط يعوم فيه.. تخيل نفسك كده صحيت الصبح لقيت عربيتك نزلت تعوم لوحدها في البحر عشان المحافظ مهتم بالترام في إسكندرية بس !".

وتابع أحمد عبده: "أهالي إسكندرية زعلانين عشان كوبري الإبراهمية طفح..المحافظ مش فاضي راح يرسم تاتوو...".

وقال معتز سليمان:"بيقولك محافظ إسكندرية قاعد بيغني إسكندرية ماريا و"ترامها" زعفران".

وأضاف الريس إيهاب: "المهم الترام أبو كافيه بخير... إسكندرية دي لو بني آدم كانت سمّعت الحكومة...كلام ولمّت هدومها وطفشت من وشّنا".

المسيري لازم يمشي

وتابع أحمد الخولي: "ربنا يستر ع الناس والله يرحم اللي توفي..حسبي الله ونعم الوكيل.. إسكندرية".

وعلقت بوسي سكوبي سكوبي: "بحرين أهم، واحد جوا وواحد برا.. المسيري لازم يمشي إسكندرية".

وقالت سلمي إبراهيم: "إسكندرية لازم حل قبل ما الشتا يزيد وكل سنة هيسوء اكتر لما احنا ف أول الشتا وكابل كهرباء يموت ٨ عشان خاطر معندوش صلاحيات يقطع الكهرباء.. تخلف".

وتابع أيوب شركس: "قعدنا نقر على إسكندرية في الشتا لحد ما أهلها اتكهربوا في المطر.. إسكندرية بتغرق حسبي الله".

وأضافت نور الحق ناجي: "في كل شارع في بلادي غرقنا ومتنا وده عادي تلات ساعات مطر..إسكندرية غرقت".