الدكتوراه "الفقرية"
إمبارح كنت نايمة مزقططة ومبسوطة وفى غاية الانشكاح .. بعد ما اترفع راسنا كلنا فى باكستان الشقيقة والريس أخد الدكتواره الفخرية من هناك وبكدة يبقى عنده شهادة جديدة جمب شهادة ناسا واخواتها، يعنى بعد ما يطلع ع المعاش هيلاقى حاجات كتيرة يحطها فى دولاب الفضية -رغم إنه ما بقاش فيه دواليب فضية الأيام دى -
لكن صحيت الصبح على زلزال وحريق فى مجمع محاكم فى باكستان وقلت دى تبقى عين وصابت الدكتواره العظيمة اللى الريس خدها وأكيد فيه حساد كتير أوى باصينله فيها.
وباحب أقول لكل الناس اللى قاعدين يقولوا كلمات محبطة وسلبية زى شرارة، النحس، النهضة ..إن ده كلام ناس مش فاهمين وأقولهم إن العين فلقت الحجر نصين وإن العين هى اللى جابت على باكستان نحس "الدكتوراه الفقرية"، اللى أخدها الريس وإن العيب مش فى الريس خالص دى كلها صدف.
وأناشد الرئيس إنه لازم يكتب فى أعلى شهادة الدكتوراه بقلم أزرق يا ناس يا شر كفاية قر.. وما تبصليش بعين رضية شوف كام مدفوع فيا!
وأقول للإخوة فى باكستان المؤمن منصاب والعين صابتكم ورب العرش نجاكم وأطالب جميع الدول الشقيقة بإطلاق بخور جاوى بالمستكة والحبهان قبل ما يدوا الرئيس بتاعنا أى دكتوراه أو أوسمة، لإن نجمه خفيف وما بيستحملش.
