نصائح النشطاء لطلاب «سنة أولى جامعة».. عمرو: «بلاش تتصور كتير هتندم».. آية:« انسى لبس الأفراح».. سارة: «متجروش ورا بعض».. أحمد: «اتكلموا بصوت واطي في الموص

قدم نشطاء تويتر عدة نصائح للملتحقين الجدد بالجامعة، من خلال هاشتاج «نصيحة لسنة أولى جامعة»، الذي تم تدشينه لتحذير طلبة أولى جامعة من بعض الأخطاء التي يتم ارتكابها دون قصد، والتي يمكن أن تؤخذ عليهم من قبل الطلبة في السنوات التي تسبقهم.. «الهاشتاج» استقطب عددا كبيرا من الطلبة وخريجوا الجامعات، حتى أصبح «تراند» على تويتر.

بلاش
قدم عمرو على نصائحه لطلاب الجامعة الجدد، قائلًا: «بما أن بكرة في ناس أول مرة هتروح الجامعة.. نصيحة لسنة أولى جامعة.. بلاش تتصور كتير عشان هتندم ع الصور دى بعد كده.. للى داخلين طب وصيدلة بلاش البالطو بكرة ملوش لزمة، ويتحفل عليك من الدفع اللى أكبر منك صدقنى».

وذكر أحمد باش: «نصيحة لسنة أولى جامعة، بلاش تكلموا بصوت عالى ف الموصلات عن إلى حصل ف اليوم بلاش تقفوا ع بابا المدرج لحد ما يفتح».

بلاش تحضنى الكشكول
ونصحت سارة طلاب سن أولى جامعة، بكلمات: «متجروش ورا بعض في الجامعة والنبى شغل ابتدائي ده خلص»، وذكر محمود نبيل: «نصيحة لسنة أولى جامعة والنبي ياشيخه بلاش تحضني كشكول المحاضرات، ولو حد سالك ع حاجة ردي عليه مش لازم يكون بيعاكس ممكن يكون معجب».

وقالت آية أحمد: «خليكوا على طبيعتكوا بلاش تلبسوا لبس أفراح ولا ضيق وتحطي ميك أب ولا تضحكي بصوت عالي علشان تلفتي النظر بلاش بجد»، واستطردت منار عرفة: «بلاش الطرح الفسفور».

بلاش الكعب
أما غزال، فنصح الزاحفون الجدد للجامعة، بقوله: « هتلاقوا ناس شكلها كبير ونضيف داخلين عليكم مرة واحدة كده، لا دا مش معيد هنا دا بتاع سنة رابعة جاى يعاينكم»، وذكر نور محمد: «والله الكعب متعملش للجامعة»، وتابع خالد أحمد: « بلاش تتصور في الجامعة وتعمل نفسك ماسك القبة».

وجاءت نصائح محمد مرسي كالتالى: «اوعي تعافر مع النوم أول ما يجيلك النوم ف وسط المحاضرة وافرد جسمك.. اوعي تضرب فول قبل المحاضرة ها.. اوعي تكون داخل هندسة ورايح أول يوم بالمسطرة الدفعات القديمة ممكن تتقمص».

عيش لوحدك
أما عماد البيلى، فطالب خريجي الثانوية العامة من الشباب بالابتعاد عن «البنات والدكاترة»، قائلًا: « البنات هتضيع فلوسك والدكاترة هتضيع حسناتك عيش لوحدك».

وأضاف يحيي سليمان: «متقلقش لو لقيت نفسك تايه في أول ترم وعامل زي الفرخة الدايخة، عادي انا بدات اعرف رأسي من رجليا في سنة تالتة».

ووجهت ميرنا ميسرا، الشباب باستغلال كل ثانية بشكل صحيح للاستمتاع بأنفسهم والفرح، مضيفة: « سنين الجامعة هتخلص هواااا.. المذاكرة بضمير عشان ربنا مش عشان التقدير.. التقدير ده نصيب».

وقال خالد رضا: «ابعد عن الجماعة اللى دايمًا تقلك يا نهار أسود إيه ده أنا محلتش حاجة فالامتحان هسقط لأن الحيوان ده أساسًا بيرتب ع الدفعة»

جروب الدفعة
وجاء تعليق عمر إبراهيم كالتالى: «اوعى تقرب من جروب الدفعة أيام الامتحانات، ولما الدكتور يقولك الجزء ده ملغي تذاكره أكتر م المقرر.. ذاكر وعيش عادي ومتربطش حياتك باللي معاك خليك ناجح لنفسك والصحبة الحلوة هي اللي هتساعدك تنجح».

ونصح Nukerhero:«مفيش حد بياخد معاه كشكول من أول يوم، مفيش حد بيروح بشنطة، ومش نادي ليلى هو عشان تلبسى هوت شورت»، واستطرد هوبا:«بس أقدر أقولك أن الكلام اللي كنت بتسمعه انك خرجت من عنق الزجاجة وإنك هترتاح بعد الثانوي ده تنساه خالص.. كله كدب»، وتابع أحمد: «ماتسألش حد أكبر منك على حاجة».