"شفت تحرش" تنشر شهادة فتاة تعرضت للتحرش بالمواصلات

نشرت مبادرة "شفت تحرش" اليوم الثلاثاء، شهادة لإحدى الفتيات تعرضت للتحرش الجنسى في المواصلات، ورد فعل الأشخاص المحيطين بها، والذي اتسم بالسلبية، حتى ممن شجعها لفظيا فقط.

نص الشهادة:

النهاردة وزي كل يوم "شغل"، ركبت من الإسعاف ميني باص يوصلني لرابعة، وكان لسه فاضي وقعدت في كرسي لوحدي، لابسة النضارة الشمس وحاطة الهيد فونز في وداني، وساندة ع الشباك ومغمضة، واتنفض على حد لازق فيا، وده ممكن يبقي شنطة أو الدنيا زحمة، لكن أنا لاقيته واحد لابس جلابيه واسعة ومش شايل أي حاجة، وللأسف ده مش كرشه، "برقت له" بقرف فاتعدل في وقفته وبعد عني شوية، وفضلت مركزة معاه.

لاقيت السواق بيقول ادخلوا جوه شويه ووسعوا الطريق، وشديت بنت تقف تسند جنبي، وزعقت له وقلت له غور أقف في أي حتة تانية، وزي الكلب راح وقف جنب واحدة تانية، وفضلت مركزة معاه وأول ما البنت التانية دي بصت له بقرف، قلعت الكوتشي ونزلت فيه ضرب وشتيمة، وهوه مش عارف ينطق ولا كلمة، ويقولي أنا عملتلك حاجة وأنا أزعق واشتم وأصريت أنه ينزل، وفعلا نزل.

كل ده ممكن يكون بالنسبة إلى مش مهم، أنا الحمد لله أخدت حقي والبنات التانية مقدرش يقرب لهم.

لكن اللي حزني بجد رد فعل الناس اللي اتقسموا تلاتة: 1) برافو عليكي جدعة اكيد غلط.

2) خلاص يا أستاذة ما هو بعد عنك ( وانا مصرة أنه ينزل).

3) مشاهد سلبي لبرنامج سخيف.

وكلهم اتفقوا على حاجة واحدة: محدش يقوم من مكانه أحسن حد تاني يقعد مطرحه.

فكرت للحظة في أحسن السلبيين اللي قال برافو وجدعة، لو راح يحكي لبنته عشان يشجعها تدافع عن نفسها ومتسكتش، لو بنته قالتله وانت عملت ايه؟ هيرد يقول ايه؟

حزينة عليه وخايفه على بنته، أحسن ميحكلهاش، وممكن تتعرض لنفس الموقف، وتخاف وتنقهر أو يحكيلها وينزل من نظرها.