بالصور.. طرائف المصريين في «شم النسيم».. ميزو:« القطة كلت فسيخ ماتت».. على:«أكلت صحابي الألمان رنجة».. دعاء: «قفشت ناس تنكين بياكلوا فسيخ».. وسهيلة:«صاحب ص
ينتظر المصريون يوم شم النسيم ليتناولوا وجبتهم المفضلة من فسيخ، ورنجة، وكل ما لذ وطاب من تلك الأنواع، وبالرغم من الكوارث التي تصاحب تناول تلك المأكولات، فإن المصريين لم يفكروا يومًا في الإقلاع عنها.
روى مستخدمو موقع التواصل الاجتماعى "فيس بوك " مواقفهم الطريفة فى يوم شم النسيم.
يوم الكوارث
قالت حسناء: "في يوم شم النسيم أخويا خرج من غير ما يقولنا وساب التليفون في البيت مقفول، وخرج من 10 الصبح والساعة جت 7 بالليل سمعنا خبر أن 7 أطفال غرقوا في البحر فقلقنا على أخويا وقعدنا ندور ونلف وفي الأخر ابن عمي راح يشوف الجثث عشان لا قدر الله إذا كان فيهم أخويا ولا لأ، وانا واقفة في البلكون أنا وأمي والرجالة راحت تدور عليه فابن عمي اللي راح يشوف العيال اللي غرقت اتصل بيا لاقيته بيعيط روحت مصوتة وأمي افتكرت أن أخويا مات فأغمي عليها، فانا افتكرتها ماتت بقيت أصوت أخويا وأمي ماتوا وفي الآخر لقيت أخويا جه وأنا بصوت فبيقولي في إيه فقولتله أخويا وأمي ماتوا وهو واقف قدامي وأصوت وفي الآخر لما استوعبت لقيت أمي فاقت وأخويا قدامي، فأغمي عليا وشمموني بصل عشان أفوق وكان يوم شم نسيم جميل أوي الصراحة".
القطة اتسممت من الفسيخ
وأضاف ميزو:" كان يوم شم النسيم وطالعين على الجنينة في مصر القديمة على النيل وقعدنا وفرشنا الملاية وجبنا البيض والفسيخ واديها، جات قطة بتنونو لأمي عاوزة تاكل راحت أمي جايبة حتة فسيخ من السمكة اللي هيا بتاكل منها واديتها للقطة مع أن القطة من الشارع وبتاكل من الزبالة بعد ما كلت حتة الفسيخ قامت جايبة كل اللي فبطنها وحاسينا أنها هايغمي عليها فا انا بقول لأمي دى القطة هاتموت من أم الفسيخ اللي ادتيهولها قالتلي قطة مرفهة واخدة على النضافة".
المعجبة والفسيخ
وروت سهيل ضاحكة: "خرجنا أنا وأهلي وصحبتى الأنتيم وأهلها في أشهر مكان عندنا، وصحبتى كانت معجبة بواحد جدًا بس هو مكنش معبرها، المهم قابلناه هو وصحابه هناك في اليوم ده وصحبتى كانت قمر ومظبطة وكده، فقعد يبصلها وهي كانت ميتة من الفرحة فا الواد قعد بيعد وأنا اللى كنت شيفاه وهيا فكرته روح قلتلها آه ده مشى زعلت وادتها رنجة وفسيخ وبصل براحتها، واما قمنا نتمشى شافته اتصدمت جه علينا واداها لبان تشكلتس وقالها ده عشان خاطر الناس إلى هتركب معاكى الميكروباص، البت اغمن عليها وخاصمتنى ييجى شهرين عشان مقلتلهاش قتل مشاعرها".
قفشت ناس تنكين بياكلوا فسيخ
وقالت دعاء: "عندنا ناس في العيلة تنكين أوووى، وطالعين فيها وبيقولوا فسيخ إيه ده يع ورنجة يع، المهم كنا عند ناس قريبنا وهما بردوا في نفس البيت وقولنا نعدى نسلم ونمشى لحسن يزعلوا وفتحولنا ولقيناهم قاعدين وفارشين وبياكلوا بصل ودول أول ماشوفناهم وشهم جاب ألوان وقعدت اضحك وقولتهم زى ما انتم وروحت مصوراهم وقفلت الباب وقولت لأهلي يلا بقى نمشى، ولحد دلوقتى بذلهم بالصورة يستاهلوا".
وأضاف معاذ: "كنت دايما بفتكر الفسيخ ده سمك دهبي، بعد كده عرفت إنه سمك معفن ولونه بقا دهبي من كتر العفانة".
اتفطم على الفسيخ
كتب أحمد "مفيش أفظع من واحدة جاية الطوارئ يوم شم النسيم بالليل عشان ابنها عنده 5 شهور وعنده ترجيع وإسهال وشوية كمان وهيدخل في جفاف، المهم الواد علقناله محاليل وفاق بنسأل أمه إنتى بترضعيه طبيعى ولا صناعى قالت طبيعى وعمره ما رضع صناعى بس النهاردة قلت أبدأ أفطمه واديله أكل، الهبلة فطمت الواد على فسيخ ورنجة".
أكلت ألمانيين "الفسيخ"
وروى على "عزمت ألمان صحابى على رنجة وفسيخ، كلو الضهر وناموا من البصل تقريبًا ودى حاجة مرفوضة عندهم تماما إنهم يناموا بعد الأكل صحيوا في نص الليل عمالين يشربوا مية وأنا كنت فاكرهم هيموتوا".
