حكايتي مع حروف زماني..!

هحكي حكاية عجب تنفع يا ناس موال، ألا وهي معنى حروف عشتها وتعلمت من أشكالها، كتبتها في أوراق ورميتها في بحر العذاب علشان يتعلم مني كل من يقرأها.. وهي دي حكايتي مع حروف زماني

(أ) أنا اللي عشت طول عمري وحداني
(ب) بكيت من غدر الصحاب ولا في صاحب واساني
(ت) تعبت من حمل حياتي وخيانة أيامي 

(ث) ثبت وجودي مع أي حد محتاج لحناني
(جـ)جنيت الشوق وأنا زارع ورد ببستاني
(ح)حولت ألم حياتي اللي ضاعت مني تاني
(خ) خاين يا زمن وجاهل اللي يسلمك أمره

(د) دريت على شمعتي يمكن تنور لي أيامي
(ذ) ذل شوفتي في عيون حبيبتي لما قسيت عليها
(ر) رأيت حبيب عمري راح مني وموش راجع ليا تاني
(ز) زودني يا رب الصبر على اللي في الضيق رماني

(س) سافرت مع الأيام وخرقت بيا سفينة أحلامي
(ش) شلت صاحبي وهو ع الجرح وداني
(ص) صبر أمي يا رب ورجعها ليا من تاني
(ض) ضعت بسبب نفسي وضاع مني حبيبي الأولاني

(ط) طريق الشوق والحرمان في كل منامي
(ظ) ظلمني الزمن وكان حكمه عليا جاني
(ع) عديت بوابة الفراق وعشت أصعب أيامي صاحبت أنا كل الناس تعبت أنا خلاص
(غ) غريب يادي الزمن سايب الغدارين في نعيم وسايبني أنا في أحزاني

(ف) فين اللي يحكي عني ويقول أنا المظلوم وبقيت أنا الجاني
(ق) قادر يا رب العباد ترجع كل اللي شوفته في حرماني

(ك) كتير عرفوا حكايتي وبكوا عيني ورجعوا أحزاني
(ل) لوم على حياتى ماشفوفتش فيها يوم حلو

(م) ما اللي راح راح أيه يخليني أبكي على يوم موش راجع ليا تاني
(ن) ندم على اللي اتمنى وماطلتوش
(هـ) هي دي حكايتي مع حروف زماني
(و) واقف على باب التوبة مستني دوري الأولاني

(لا) لا موش هلوم على حياتي وهصون نفسي اللي صايناني
(ى) يااه لو كل واحد يحاسب نفسه ويرجع لربه من تاني

معلش يا زمن على اللي عملته فيه ولا هعتب عليك، ملعون يا زمان وأنت زمان الجنيه ومفيش حد حب وطال، في نهاية كلامي كتبت حكايتي مع حروف زماني بسبب حالي اللي مش عاجبني..
بسبب الهم اللي مش سايبني
كل ما ببعد عنه ينده لي ويجيبني
ارحمني يا زمان كفاية اللي جرا 
ارحمني دا أنا إنسان بسيط مابحبش المنظرة 
وكل ما أتقدم خطوه ترجعني عشرة لـ ورا
هندم على سنيني اللي راحت
ولا على أحلامي اللي تاهت
ولما فرحت يوم
لقيت الفرحة ماتت
الحزن دولة عشت فيها
الحزن دولة لا يعيش فيها سوى الحزنان