"بص لبكرة" شعر لـ "سامح لطف الله"

بص لبكرة
ف ريح الجامعة وجنب السور
الإسعاف بتلم بلاوي
إغسل راسك يله ياعبس
يغسل عينك حبة بيبس
أصل الغاز ف الصدر يكلبش
خطف الروح من غير ما تحس
هي الروح جوة الزنزانة
هتخاف طلقة هتخاف حبس؟
هتخاف بِلْي الرش ف عينك
ولاَّ تخاف الشرطة تهينك؟
عمر الموت ما بيكسر نفْس!!
يكسر قلب المصري يهينه
لو بالجبن ف لحظة يحس
قلبه ف كفه روحه ف إيده
لو يستشهد صوت زغاريده
لآخر نقطة ف دم وريده
لآخر كلمة بصوت الهمس
هتعيش بلدي بكرة وبعده
وننسي الدوخة ف قصة أمس.