"أنا الدليل".. للشاعرة دعاء عبدالوهاب

أنا الدليل
مفيش دليل ؟؟؟؟؟
أنا الدليل ..
أنا الدم اللى سال ع الأرض
ما استكفِـت ..
أنا العين اللى صابها الغدر
واتصفِّـت ..
أنا الأم اللى حرقوا فؤادها ع الغالى
ولبست شال محنِّى بدمه واتدفِّـت ..
أنا الدليل ..
أنا المخنوق بــ سم الغاز على الكوبرى ..
أنا المضروب بــ مِية خرطوش على ضهرى
أنا اللى العمر راح محنة ورا محنة ..
وقلت شاريكى
ولا مرة نفَد صبرى ..
أنا المجنى عليه واليوم
بقيت جانى ..
واللى قتلنى برىء
وعيونه ناكرانى ..
خرجوا الديابة من القفص أحرااااار ...
وانا اللى لسه سجين
محبوس فـ أكفانى
يا نكسة كانت ف التاريخ
واليوم بقِت وكسة ..
يا قلوب ومتلونة بالغدر والخِســة ..
لو كنتوا فاكرين حلمنا ممكن يموت ..
متفرحووووووووووش ..
نـــار القصاص والدم هتشتعل لسـه.
جدير بالذكر أن قصيدة "أنا الدليل" هى إحدى قصائد ديوان "غريق عـ البر" للشاعرة دعاء عبدالوهاب والصادر عن دار دوّن للنشر والتوزيع.