السيسي يتوقف بسيارته للتحدث مع أسرة مصرية تركب دراجة بخارية.. الرئيس: حرام عليك كده خطر جدا ومش لابس خوذة.. عاوز حاجة صحيح

توقف الرئيس عبد الفتاح السيسي ليتحدث مع أسرة مصرية كانت تستقل دراجة بخارية تصادف تواجدهم اثناء مرور الرئيس ، حيث هنأهم بمناسبة شهر رمضان المعظم واستمع الي احوالهم المعيشية، وشدد عليهم بضرورة الالتزام باجراءات الأمان حرصاً علي سلامتهم.

وتفاصيل الحوار:
الرئيس السيسي: رايحين فين.
رب الأسرة : رايح أوديها عند أختها.
الرئيس السيسي : هي زوجتك.
رب الأسرة : مراتي ورايح أوديها عند أختها.
الرئيس السيسي : ده بنتك
رب الأسرة : أه أبني ياباشا
الرئيس السيسي : حرام عليك كده خطر جدا ومش لابس خوذه 
 رب الأسرة: كل سنة وأنت طيب ماشي واحدة واحدة.
الرئيس السيسي : بتشتغل إيه
رب الأسرة : بشتغل ديليفيري 
الرئيس السيسي : ساكن فين 
رب الأسرة : في الكيلو 4 ونص
الرئيس السيسي: بتكسب كام في اليوم 
رب الأسرة: الساعة بـ10 جنيه ونصف الخدمة يا افندم 
الرئيس السيسي : أشرح لى أكتر
رب الأسرة : الساعة ب10 جنيه ونص الخدمة يا افندم ..باخد نص الخدمة ..لو مثلا ألماظة ب6 جنيه أخد 3 جنيه..لو مشوار بعشرة أخد 5 جنيه 
الرئيس السيسي: الموتوسيكل بتاعك ولا الموتوسيكل من عندهم.
رب الأسرة : بتاعي
الرئيس السيسي : الموتوسيكل بتاعك أنت
رب الأسرة : أه بتاعي أنا..ولو مشوار بعيد بعشرين هما 10 وأنا 10
الرئيس السيسي: عاوز حاجه..صحيح
رب الأسرة : ألف شكر يا أفندم
الرئيس السيسي: والعيال ..والسيدة مش محتاجين حاجة.
الأسرة : الله يخليك
الرئيس السيسي : علشان خاطر الولد ده
الأسرة : شكرا ياريس
الرئيس السيسي : كل سنة وأنتم طيبين

وتفقد الرئيس عبدالفتاح السيسي اليوم الأعمال الإنشائية لتطوير عدد من الطرق والمحاور والكباري بمنطقة شرق القاهرة.

وقال السفير بسام راضي المتحدث باسم رئاسة الجمهورية بأن الرئيس حرص على الاطمئنان من العاملين في المواقع المختلفة على سير العمل وكذا الاستماع لآرائهم، مهنئاً إياهم بمناسبة شهر رمضان المعظم، ومشددا علي الالتزام بالاجراءات الاحترازية الخاصة بفيروس كورونا حرصاً علي سلامتهم.