Advertisements
Advertisements
الثلاثاء 13 أبريل 2021...1 رمضان 1442 الجريدة الورقية
Advertisements
Advertisements

بالصور.. أطرف مواقف تعرضت لها عرائس في حفل الزفاف.. «سارة»: «رشوا العروسة بمبيد حشري».. «إيمان»: «العريس جر العروسة على وشها».. «أميرة»: «فستان العروسة وقع».. «غادة»: «كرسي العروسة اتقلب»

بدون تبويب

آية حمدي- شيماء عزت


ترتبط حفلات الزفاف في أذهاننا بالرومانسية والفرح الذي يملأ قلوب الجميع، لكن بعض المواقف الطريفة والمحرجة تعكر صفو ذلك الفرح، وهو ما رواه رواد "فيس بوك" عبر صفحة "The Lady"، وتذكروا أكثر المواقف المحرجة التي تعرضت لها عرائس خلال حفل زفافها.

رشوا العروسة بمبيد حشري
قالت سارة: "فيه فرح حضرته كان في أرض زراعية، المهم مع الإضاءة كمية حشرات فظيعة كانت بتقع على الناس غير إنها دخلت في شعر العروسة وفي الفستان، المضحك إنهم رشوا العروسة بمبيد حشري".

أختي بتولع على طريقة اللمبي
وأضافت آية: "كانت خطوبة أختى وجه ولد صغير رمى صاروخ تحت رجليهم وهما قاعدين ولقيت الدخان من تحت الفستان وأنا وأختى والعريس بندور على النار وأنا ميتة من الضحك وكل اللى فكراه فيلم اللمبي نوسة بتولع بس الحمد الله ربنا ستر ومولعش".

العروسة وقعت على وشها
وروت إيمان: "العريس كان عايز يشد العروسة ويجري قبل الفرح ميخلص فهو مقالش للعروسة وكان عايز يعملها مفاجأة قام شدها راحت دايسة على الفستان ووقعت واتقطعت سوستة الفستان، وكانت مفاجأة سودة على دماغه والعروسة مخدتش الموقف بضحك وكشرت وقلبت عليه وكل ميجي يراضيها تقوله ابعد عني يا محمد ابعد عني وياعيني بقي هو ماشي في حتة وهي في حتة".

سقوط العروسة وسط المسرح
وقالت عائشة: "العروسة جات تقعد على الكوشة وكانت في الشارع ومسرح وكدا والخشب مكنش متثبت جات تقعد على الكرسي سقط في الخشب ووقعت في قلب الخشب والعريس مش عارف يطلعها وواقف ميت من الضحك، والفرح اتحول لفيلم كوميدي المعازيم طول الفرح يفتكروا الموقف يضحكوا".

الفستان وقع
وأضافت أميرة: " كنت في فرح والعروسة رفيعة أوي أوي وكانت لابسة فستان كب والعريس بيرقص معاها بقوة حبتين الفستان وقع".

سقوط كوميدي
وقالت غادة: "كنا في فرح واحدة جارتنا بس كان عريسها في بلد تاني فعملت حنة كانت كوشة بكرسي واحد واحنا قاعدين أنا وإخواتي الاتنين أختي بكلمها وباصة ناحيتها لقيت الستات بتجري ناحية العروسة وبنبص على الكوشة لا لقينا العروسة ولا الكرسي الستارة بتاعة الكوشة بس أتاري العروسة اتقلبت بالكرسي لورا واحنا اتفتحنا في الضحك".
Advertisements
Advertisements
Advertisements
Advertisements