كنباوى وكنباوية.. حلقة رقم "2".. الليلة يا كنباوى!!

> كبناوية: صباح الخير يا سبعى بقى كده، إمبارج ألبس لك قميص النوم اللى انت بتحبه وتدينى ضهرك وتنام، ده برضه يا خويا يبقى خميس؟
- كنباوى: خميس إيه يا ولية؟ وجمعة إيه؟ ما تتهدّى وتهدّى أعضائك، مين ليه نفس يعمل حاجة؟
> كنباوية: ونفسك اتسدّت من إيه يا خويا كفى الله الشر؟
- كنباوى: إنت يا ولية ما بتحسيش، إنت مش شايفة الهنا اللى احنا عايشين فيه والديون والهم والغم والبنت اللى مش عارفين نسترها والواد اللى قاعد لنا طول النهار على القهوة لا شغلة ولا مشغلة، وطول الليل على الفيس بوك، وأنا بصرف عليه لحد النهارده، وحال البلد اللى نايم من يوم ما الإخوان مسكوا، والوحل اللى احنا فيه، دول ما يعرفوش يدوّروا قرية أو عزبة مش يمسكوا بلد زى بلدنا. اللى يخرب بيوتهم زى ما خربوا بيوتنا.
> كنباوية: وماله يا خويا ما الناس كلها زى بعض على دا الحال، قول يا خويا إن انت كبرت وراحت عليك.
- كنباوى: آه، أنا كبرت وانتِ صغرتى، إنتِ جبلّة يا ولية بجم ما بتحسيش، البلد بتولع وقرّبوا يشهروا إفلاسها، وقنديل متفائل، أول مرة أشوف واحد وشّه شؤم متفائل، الله يخرب بيته كان ماله الجنزورى.
> كنباوية: الجنزورى مش إخوانى يا خويا مش إخوانى.
- كنباوى: عندك حق، خليكى حَسِيسة بقى واتهدّى واهدى شوية.
> كنباوية: إنت واحشنى يا خويا.
- كنباوى: وانتِ كمان وحشانى بس منين نجيب نفس.
> كنباوية: أنا أجيب لك النفس، اصبر بس انت علىَّ أقوم ألبس لك قميص النوم الأسود اللى بيعجبك.
- كنباوى: أسود، هى ناقصة سواد؟ اتلمى يا ولية.
> كنباوية: والله ما أنا سيباك الليلة يا كنباوى.
- كنباوى: هىَّ حبكت.
> كنباوية: الليلة، أنا قلت الليلة يعنى الليلة.
- كنباوى: طب يمين بالله.
> كنباوية: ما تحلفش، سوقت عليك النبى حبيبك.
.. ورضح كنباوى لكنباوية، وبعد خمس دقائق بالتمام والكمال.
> كنباوية: ما تزعلش نفسك يا خويا، حسّك بالدنيا.
.. فى سرّها: جات الحزينة تفرح مالقتلهاش مطرح، الناس خيبتها السبت والحد وأنا خيبتى ما وردت على حد.
> كنباوى: بتبرطمى تقولى إيه؟
- كنباوية: بقولَّك يا خويا فيه بتاع كده بقولوا عليه بيقوّى، أم أمانى جارتنا بتقول جوزها بياخده ومفعوله كويس وسرّه باتع.
> كنباوى: إيه يا وليه انتم بتقعدوا تتسايروا فى المسخرة دى؟ روحى اقعدى مع جارتك وافضحينى يلَّا.
- كنباوية: عيب يا خويا ما اقدرش أصغرك أبدًا، ده أنا دايمًا بقول اللى مش فيك وباقول جوزى سبع.
> كنباوى: اللى مش فىَّ، آه يا واطية، إنت عوزانى آخد فياجرا؟!
- كنباوية: أيوه يا خويا هىَّ دى.
> كنباوى: إن شاء الله علينا وعليكى خير يوم الخميس الجاى أبقى أجيبهالك.
- كنباوية: أيوه كده يا خويا خلينا نجيب لنا حتة عيل يتدلع علينا.
> كنباوى: عيّل إيه يا وليه؟ إحنا لسه حنعيده من تانى؟ إحنا قادرين نصرف على اللى عندنا لما نجيب لنا هم جديد؟ ونربيه إمته ده؟
- كنباوية: يا خويا العيال بيجوا برزقهم.
> كنباوى: رزقهم مين يا ولية؟ قولى بمصاريفهم، قولى بهمهم، قولى بتعبهم.
- كنباوية: مديحة جارتنا أكبر منى بسنتين وحِبْلَة.
> كنباوى: قولى كده الحكاية مش حكاية عيل، الحكاية حكاية غيرة نسوان، وأنا اللى أدفع ثمنها.
- كنباوية: أنا مابغيرش من حد يا خويا.
> كنباوى: لأ، ما هو واضح، اتلمّى يا ولية وخلِّينى أقوم أشوف حالى.
- كنباوية: إنت كده يا خويا ما تبلّش ريقى أبدًا.
> كنباوى: يوم الخميس الجاى ده إذا جه ولقانى أبقى أبلهولك.
.. وفى سرّه: الولية عمالة تقول يا خويا يا خويا، ما قالتش يا راجلى ولا مرة، وحطلع راجلها منين؟
وأنا ما عرفتش، دى حاجة تكسف وتكسف ليه، ما قنديل ماعرفش، ومرسى ماعرفش، وخيرت ماعرفش والإخوان كلّهم ماعرفوش.
هى جات علىَّ أنا؟ على الأقل مراتى حتبقى ستر وغطا علىَّ، لكن مصر عمرها ما حتكون عليهم ستر وغطا وحتفضحهم فضيحة بجلاجل.
> وازاى أعرف وحالى نايم وحال البلد كله نايم؟
- الله يخرب بيت الحكومة على مرسى على الإخوان، نيّموا حال البلد كله، نيّموا كل حاجة، كل حاجة.