"ما ترجعليش" قصيدة لـ"بسمة شعبان"
"ما ترجعليش!" من أروع قصائد شاعرة كفرالشيخ "بسمة شعبان" عضو نادى أدب قصر ثقافة كفرالشيخ، وعضو بصالون القرضا الثقافى.
ونالت "بسمة" العديد من الجوائز، وطبعت لها وزارة الثقافة ديوان "نسيت الزمان".
وتقول فى هذه قصيدتها...
ما ترجعليش !!
بكل حنانى مش هاقدر !!
أدوب تانى فى بحر عينيك
أدووور حواليك
أدارى الجرح جوايا عشان تقدر تخطى الصعب
لأن القسوة قسيتنى وخليتنى كأنى مانيش
لأنك مهما حبيتنى وحسيتنى ماحاستنيش
خلاص قلبى فى قلبه جراح
وميت كدبة وكام إحساس
بإنك خالى من حبى ومن صدقى
و م الإحساس
وزيك زى كل الناس
ما تفهمنيش
يا أجمل حلم فى وجودى دبحنى سنين
دا مهما العمر بيعدى
تملى حزين
كتب جرحى فى كراسى خلاص هنساك
لا هقبل تانى تهوانى ولا هاهواك
هاتوه تانى واضيع تانى واموت تانى
وتانى هاعيش !
خلاص قلبى قفل بابه فى وش الآه
ولو بعدك يضيع حلمى اللى باتمناه
انا باقدر وباتصبر بكام بسمة وضحكاية
أدارى جروحى فى ملامحى
وتدبحنى
بلادة حس فى حكاية
لا يوم فرحك هايروينى
ولا دمعك ها يكوينى
ولو ذكراك ها تحيينى
هامووت
وأنا طبعى نساية !!!
