حملة بلوك لمرسى على "تويتر"

"مرسى لو طلع قال: لم أكن أنتوى الترشح، هتكون دى الحاجة الوحيدة اللى ماكدبش فيها"، كان هذا أحد تعليقات الشباب بعد استخدام مرسى لتويتر لمخاطبة الشعب بعد أحداث أمس الدامية، الشباب أبدوا استياءهم بسبب خطاب مرسى الإلكترونى، الشباب تساءلوا: "لو عايزين نخلع الريس نعمله إيه "بلوك" ولا "ريموف"؟ "فيتو كافيه" رصدت تعليقات الشباب على خطاب الرئيس..
أحمد الشيخ: طب ده ع الأقل مبارك طلع بخطاب.. عمل خطاب ثبّت بيه تلت اربع الشعب، إنما ده مش عارف يعمل أى حاجة خالص.
محمد عطية: على حساب مرسى الرسمى على تويتر: رسائل قصيرة من السيد رئيس الجمهورية.. هو فى عرض رسايل مجانية ولا إيه؟
هالة البولاقى: نهضة دى ولا مش نهضة يا متعلمين يا بتوع المدارس؟!!
محمود الفولى: يعنى كان عندنا رئيس واتخلع؛ لأنه مبيسمعش وفارق عن الشارع بكام يوم.. جالنا رئيس لما حب يوجه رسالة للشعب بعتله تويتة..ومضمون التويتة هو نفس كلام الرئاسة المعتاد.. الثوار قطاقيط وأمامير ولازم يغسلوا رجليهم قبل ما يناموا، بس بيندس بينهم بلطجية وحشين ويعّ.. لحد إمتى هيفضل التعامل مع الدم بالاستهتار.. لحد إمتى هتفضل مؤسسة الرئاسة منفصلة عن الواقع وعن الشعب؟!!
مريم آدم: مرسى لو طلع قال: "لم أكن أنتوى الترشح" هتكون دى الحاجة الوحيدة اللى ماكدبش فيها.
محمد عوض: ملخص تويتات مرسى: متفتحش الفرن والشواية مع بعض علشان القطر لما اتأخر الكورة طلعت أوت.