قانون التظاهر الجديد.. يا جماله!

كانت المذيعة "الجميلة" تستعرض "قانون التظاهر" مع ضيوفها في الاستوديو.. وفجأة هبت زوجتى وكأنها إعصار تسونامي قائلة: "الناس دي عايشة في غيبوبة؟!"
سألتها: تقصدي مين المذيعة ولا الضيوف؟!
- لا دول ولا دول.. أنا قصدي إللي عمل القانون ده..
- ليه بقى.. مش القانون ده مطلب شعبي في الأيام السودا إللي بنعيشها دلوقت..؟ 
- صحيح مطلب شعبي.. بس واضح إن إللي كتبه عايش في بلاد "الواق الواق"..
- ليه بقى إن شاء الله؟!
- انت مقرتشى مواد القانون ده ولا إيه؟!.. بيقولك "ممنوع بشكل قاطع التظاهر أمام المنشآت العسكرية أو الشرطية كالأقسام.. ومن يخالف ذلك يتعرض للسجن وغرامة لا تقل عن ألف جنيه ولا تزيد على 30 ألفا والسجن لثلاث سنوات".
- ما هي دي حاجة كويسة..
- كويسة إيه ونيلة إيه.. وهو إللي معاه 30 ألف جنيه هيتظاهر ليه.. دا بالتأكيد هيخاف على مصالحه وفلوسه..
- ممكن يتظاهر عشان "الحرية"..!
- هههههههههههههه... "حرية" ؟!.. أومال إللى مش لاقي ياكل يعمل إيه.. يروح يفجر نفسه؟!