حريم الوزرا مبيطبخوش فى البيت!

كنت أتابع مع زوجتي المصون إحدى جولات وزير التموين والتجارة الداخلية.. وفي سياق تصريحاته التليفزيونية قال الوزير إنه سيتم توصيل أنابيب البوتاجاز "دليفري".. يعني لغاية البيت بمجرد الاتصال بأحد الأرقام التي حددتها الوزارة..

قلت لزوجتي: "والله حاجة جميلة جدا.. وهتريحنا من مافيا الأنابيب والسوق السودا إللي بيشتروا الأنبوبة باتنين جنيه ونص ويبيعوها بـ40 و50 جنيه!".

فجأة صرخت زوجتي قائلة: "يعني إيه الكلام ده.. وإزاي يعني؟!".

أنا: "كلام الوزير واضح لا لبس فيه".

هي: "انت ما خدتش بالك من باقي كلامه ولا إيه.. بيقولك الأنابيب هتوصل المنازل خلال 48 ساعة!".
أنا: "ودي فيها إيه؟!".

هي: "فيها إننا هنقعد يومين من غير أكل لو الأنبوبة فضيت.. هو أنا هعرف الأنبوبة هتفضى إمتى والساعة كام عشان ألحق أتصل بيهم.. دا كدا الوزير بيسلمنا تسليم أهالي لمافيا السوق السودا إللى الواحد منهم تلاقيه في وشك 24 ساعة.. ومن غير ما تكلف نفسك وتتصل بيهم.. أو تلاقي الكمبيوتر يرد عليك ويقولك جميع الخطوط مشغولة الآن.. برجاء الاتصال في وقت آخر.. وحلني بقى على ما حد يرد عليك!".

أنا: "آهو انتو كده يا ستات.. ما يعجبكوش العجب ولا الصيام في رجب".

هي: "لا يا حبيبي.. الوزرا بتوعكم هما إللي باين عليهم بياكلوا دليفري.. ونسوانهم ما بيطبخوش في البيت!".