مظاهرة إلكترونية تحت شعار"يالى ساكت ساكت ليه.. شاحن خطك ولا إيه"
عودة الزمن الجميل للرنات.. شعار رفعه شباب "فيس بوك" فى مواجهة غلاء أسعار كروت شحن الموبايل، تكتيك "الرنات" ورسائل "كلمنى شكرًا" عاود الظهور بين الشباب للاستغناء عن المكالمات، الشباب لم يكتفوا بذلك ونظموا مظاهرة إلكترونية تحت شعار " يالى ساكت ساكت ليه.. شاحن خطك ولا إيه" ، "فيتو كافيه" رصدت تعليقات الشباب ..
ألفت حسين: هو القرض بتاع صندوق النقد الدولى ده لازم يبقى فلوس ولا ممكن يحولولنا بيهم رصيد..؟!
سامح السلامونى: والله المفروض بقى يزودوا الكول مى عشان الناس تفهم بعض ونعرف نتعامل.
محمد عبد الهادى: بص يا صاحبى، عاكست اختى وسامحتك، قلبت العِشّرين جنيه وسامحتك، أبوك حدفنى بالطوب زى العيال الصغيرة وسامحته، أمك قالت على حرامى موبايلات وسامحتها؛ إنما أجى أرن عليك تقوم فاتح على، ده أنا أعلقك أنت وأبوك وأمك.
بسمة الألفى: رنة واحدة تنزل؛ رنتين توطى النار على الرز؛ تلات رنات تغير لاختك؛ أربع رنات تعمل عجين الفلاحة؛ خمس رنات،،، إلخ
"شفرات حملة مصريون ضد غلاء كروت الشحن".
علاء مؤمن: لا خوف على المصريين من غلاء كروت الشحن فنحن شعب يجيد تكتيك الميسد كوول ويفهم شفرة عدد الرنات جيدًا.. بل إنها هى
واحدة من أسرار سعادتنا.
محمد منيعم: أنا زعلانة منك يا حمادة مبقيتش تسأل فيا.
غصب عنى يا سوسو أصل الكروت غلت.
آه قول انك بخيل بقى.
أنا بقول نسيب بعض يا شوشو عشان مش هقدر على تمن كروت الشحن
شوشومين؟
ماهو ده الموضوع اللى كنت عايز أقولك عليه.. مقدرش على كارتين.
محمد فاضل: ياللى ساكت ساكت ليه شاحن كارتك ولا ايه.
