فى عيد ميلادك يا ناصر.. لـ"توفيق ماضى"

ألف الدكتور توفيق ماضى أستاذ إدارة الأعمال بجامعة الإسكندرية "سابقا" وبجامعة الكويت حاليًا قصيدة شعرية يعبر فيها عن مشاعره تجاه الرئيس الراحل جمال عبدالناصر فى ذكرى ميلاده، وتقول كلماتها:
فِى عِيدْ مِيلاَدَكْ يَانَاصِرْ أنَا جَىّ أشْكِيلـَكْ
وِأفـُكْ هَمِّى مِعَاكْ، وِتـَخُدْنِى فِ مَوَوِيلـَكْ
وَأعِيشْ جَمَالْ ابْتِسَامِة اللّى عِشِقْ بَلـَدُهْ
جَايِزْ أشُوفْ الأمَلْ، وِأنَوّرْ قَنَادِيلَكْ
*****
فِى عِيدْ مِيلاَدَكْ يَانـَاصِرْ الوَطـَنْ زَحْمِة
وِالكـُلْ مَاشِى مِدَهْوِلْ وِالحَيَاة لـَخْمِة
وكِلْ يُومْ افـْتِكِرْلـَكْ حُبّكْ لِأوْطـَانـَكْ
وفْ كُلْ طـَلـْعِتْ نِهَارْ بَاطـْلـُبْلـَكْ الرّحْمِة
*****
فِى عِيدْ مِيلادَكْ يَانَاصِرْ تِقْلِتْ الأحْمَالْ
وِفْ هُوجِةْ العَوْلَمِهْ دَخَلـُوا كَامْ دَجّالْ
وِلـَمّا نَهَبُوا فِى خِيرْهَا وِالفَقِيرْ اتـْهَانْ
صرّخْتْ مِنْ عِزْم مَابِى "إنْتِ فِينْ يَاجَمَالْ؟"
*****
فِى عِيدْ مِيلاَدَكْ يَانَاصِرْ إِيدِى عَلَى خَدِّى
وِكُلْ كِلـْمة بَاقـُولـْها لاَ جَايبَة وَلاَ تْوَدِّى
الكُل عَمّالْ يـِفَضْفَضْ وَلاَ حَدْ ِسَامِعْلـُه
وَلاَ دَولَة غيرِي بـِتـِـشْرَبْ مِ الفَسَادْ قَدِّى
*****
أنـَا بـِالأمَانَة بَقـُولـّكْ يَانَاصِرْ، النـّاسْ بـِتـْتـْكَلـِّمْ
وِالكـُلْ عَمّالْ بـِيـِكْتِبْ، وَلاَ حَدْ مِتـْكَمِّمْ
وَلاَ فِيه عَذَابْ فِى السِّجُونْ، وَلاَ "حَمْزَة بَسْيُونِى"
بَسْ الكَلاَمْ فِى الهَوَا، وَلاَ كِلـْمَه بِتـْعَلـِّمْ
*****
يَامَا نَاديتْ يَابَا نَاصِرْ بـِوِحْدِةْ الأوْطـَانْ
وِإِنْ إِبنْ العَـرَبْ عُمْرُهْ مَا يُومْ يـِنـْهَانْ
مَعْقُولْ هَنِدْفِنْ يَا عَالـَمْ حِلـْمِنَا بْ إِيدْنِهْ !!
وِيِقَسِّمُونـَا حِتَتْ، وِكُلـِّنـَا نِنْهَـانْ !!
*****
دَا مْعَاكْ عِرِفـْنَا يَا نَاصِرْ، إن الوَطـَنْ لِلنَاسْ
وَلاَ حَدْ فِيه يـِنْظـِلِمْ أوْ فَقِيرْ يـِنْدَاسْ
وِكُلْ وَاحِدْ بـِيَاخُدْ حَقُّه بـِالشّعْرَه
مِنْ غير لاَ وَاسْطـَه، وَلاَ إِيدْ لِلـْكِبـِيرْ تِنْبَاسْ
*****
مَعَاكْ عِرِفـْنـَا يَا نَاصِرْ، العَدْلْ بين النـّاسْ
وِالكـُلْ عَاشُهْ وِشَافـُه، مِشْ كَلاَمْ كُرّاسْ
وِاللّى بـِيـِعْرَقْ بـِيَاخُد حَقُّه بـِالسّحْتُوتْ
عَشَانْ كِدَه لِسّهْ حُبّكْ، فِى قـُلـُوبْ النّاسْ
*****
وَيـّاكْ هَتـَفْنـَا يَا نَاصِرْ إِنْ الوَطـَنْ لِينَا
وِكُلْ حَبِّةْ عَرَقْ، تِنْتِجْ زِهُورْ زِينِه
ولـَمّا خِيرْنَا يـِزِيدْ، بـِنـْفَرّقـُه عَ الكُل
لِأنْ حِلـْمْ الوَطـَنْ، بـِيْحَقّقُه بـِينـِه
*****
يَامَا حَلِمْنَا مِعَاكْ يـِبْقَى الوَطـَنْ جَنـِّهة
وِفْ كُلْ جَامعَة وِمَصْنَعْ، كَانْ الجَمِيعْ بَنـِّهْ
دِلـْوَقـْتِى قـَاعْدِينْ يـِهِدُّوا وِالفَسَادْ بَالكـُومْ
وِالنّاسْ بـِتِضـْحَكْ عَلينَا، لاَ شَنّة وَ لاَ رَنـّة
*****
وَاللهْ مَاهَنْسَى يَانَاصِرْ فَرْحِتَكْ لِلنَـاسْ
وِانتَ بـِتِفْتَحْ لِهُمْ، شِرْكِةْ حَدِيدْ وِنْحَاسْ
وِرِبِّنَا هُوّ وَحْدُه، إدّالـَكْ حَنَاجِرْهُمْ
حَاطِطْ عَليكْ القُبُولْ، وِشّكْ مَلاَنْ إحْسَاسْ
*****
تَعَالَى شُوفْ يَابَا نَاصِرْ شِلـِّةْ المَقَاطِيعْ
قـَاعْدِينْ عَلَى قـَلـْبـِنَا وِحَقّنَا بـِيضِيعْ
مِنْ طـُولْ وِجُودْهُمْ بَقينَا غُرْبْ فِى بَلَدْنِهْ
وَعَشَانْ نِعيشْ وِسْطـُهُمْ، مِحْتَاجِينْ لِشَفِيعْ
*****
تَعَالَى شُوفْ يَابَا نَاصَرْ شِلـة بِدُونْ إحْسَاسْ
قـَاعْدِينْ يـِنـَافـْقـُوا الرّئِيسْ، وِيـِعَادُوا كـُلّ النـّاسْ
وِفْ كـُلْ حِتّة يِدَافِعُوا وِ =الشِّهَادَه زُورْ
وِاللىِ يِخَالِفْ وِيـِنْصَحْ، لاَزِمْ قـَوامْ يـِنْدَاسْ
*****
تَعالَى شُوفْ يَازَعِيمْنَا الوَطـَنْ بَقَى ايهْ
أرْضُه وِأكْلـُه وِشُرْبُه، لِعْبِه فِى إيدْ كَامْ بـيهْ
قَاعْدِينْ بـِيـِتـْحَكـِّمُوا وِيْوَلـّعُوا الأسْعَارْ
وِمَهْمَا شَدّوا عَلينَا، وِلاَ حَتّى نِسْألْ ليه
*****
إزّاى يـِكُونْ الوَزِيرْ مِنْ شِلّةْ التُّجّارْ؟
وِالأكْلْ مِنْ عِبِّهُمْ، لَوْ حَتّى شَاىْ وخْضَارْ
وِحَدِيدْنَا مِنْ عَنْدُهُمْ لَوْ نِفْسِهُمْ سَمَحِتْ
بَعْدْ اتْفَاقـْهُمْ عَلِينَا، وِالسِّعْرْ يـِبْقَى نَارْ
*****
تـَعَالـَى شـوفْ يَابَا نـَاصِرْ صَفـّوا كَامْ شِرْكِة
ولِيلاَتِى قـَاعْدِينْ لِنَا، وِيْقَسِّمُوا التـِّـرْكِة
وِاللّى اشْتَرَاهَا مَانِعْرَفْ أصْلـُه مِنْ فَصْلـُه
عَلَى غَفْلَه طـَبْ عَلينَا، مِنْ بـِلاَدْ حِرْكِة
*****
لِيهْ يَابَا نَاصِر يـِبـِيعُوا شِرْكَة كَسْبَانِة
وِيِرْفِدُوا بِالآلافْ فِى خَلقْ غَلـْبَانِة
حَرَامْ عَليكُو يَا ظـَلـَمِة دَا مَصْر بـِتـْفَلـِّسْ
وَلاَ عَادِ حِيلِتْهَا النـِّهَارْدَة لاَ كَانِه وَ لاَ مَانِه
*****
وِجِه بـِتـُوعْ الانـْفِتَاحْ عَمَلـُوا "الكِويزْ" بـِيهُمْ
وِخَلـّوا سِينَا الحَبـِيبـِة، مُنْتَجَعْ لِيهُمْ
وِنِسِينَا دَمْ الشّهِيدْ اللّى نَزِفْ فِيهَا
وِعَلـَنِى بَاعُوا بِمِيلـَمْ، غَازْ الوَطـَنْ لِيهُمْ
*****
قَالْ إيه نِمَايِنْ مِعَاهُمْ عَشَانْ نِجِيبْ مُبِيدَاتْ
وِإِنْ بَلـَدْ الزِّرَاعَة يِلـْزَمْلِهَا الخَوَجَاتْ !!
وِهُمّه يـِرْمُوا لِنَا سِمْ يـِسَرْطـَنـِّه
وِبَعْد تـَلاَتِينْ سَنِهْ، آدِى شَبَابْنـَا مَاتْ
*****
ليه يَابَا نَاصِرْ وِلاَدْنَا جَهِّزُوا البَاسْبُورْ؟
وِالكُلْ حَاسِسْ بـِإنـُّه، جُوّهْ سِجْنْ وِ جُورْ؟
عَايـِشْ بـِيـِحْلَمْ يُومَاتِى بـِالسّفَرْ بَرّهْ
وَلاَ عَمْرِهُمْ حَسُّوا مَرّة، إنْ لِيهُمْ دُورْ
*****
ليه يَابا نَاصِر زَمَان كَبَّرْت فِينا الغَدْ؟
وحْلِمْنا ويَّاكْ برحْمِة وعَدْل مَالهُم حَدْ؟
أصْلَكْ ماشُفْتِشْ ياعَمِّى "مَارِينَا ولاَّ شَرْمْ"
داللِّى خَدُوهَا جَدْ، بَقُوا يِشْقُوا وِ مالهُم حَدْ
*****
ألاّ صَحِيحْ يَابَا نَاصِرْ الرُّوسْ بـِتْتْسَاوِهْ؟
وِإنْ كُل اللّى يِعْيِهْ، مِنْ حَقُّه يِدّاوِهْ؟
طـَبْ ليه اللّى عَنْدُه الكّبِدْ أوْ فَشَلْ كَلَوِى
يـَا إمّا نِلـْقَالـُه صَدَقـَهْ، يَايْرُوحْ يـِتـّاوِهْ؟
*****
أنَا يَابَا نَاصِرْ خَلاَصْ، فَاضْبِى وِطَفَحْ الكّيلْ
تـَعْبَانْ وِضَهْرِى انـْقَطَمْ، مِ الهُمُومْ وِ الشّيلْ
وِيُومَاتِى أصرّخْ وَآهَاتِى، يِمْكِنْ يِغِيتـُونِى
وِفْ كُلْ مَرّة يـِقُولـُولِى، إنْتَ فِى آخِرْ الدّيلْ
*****
يَاخْوَنّا اتْعَلـِّمُوا مِنْ نَاصْر اللّى عَاشْ
سَاكِنْ قـُلـُوبْ البَشَرْ، وِعُمْرُه يُومْ مَانْحَاشْ
دَا أصْلـُه عَاشِقْ وِدَايبْ فِى تـُرَابْ وَطـَنـُه
وِيُومْ فـُرَاقـُه لِنَا، وَلاَ كَانْ فِى جيبُه كَاشْ
*****
كُلْ اللّى قـَادِرْ أقـُولـُه، "الزّعِيمْ نـَاصِرْ"
لـَوْ حَتّى قـَالوا بَخَرّفْ، "الزّعِيمْ نـَاصِرْ"
أنَا أصْلِى عِشْت فِى زَمَنْ فِيه الوَطـَنْ لِلـْكـُلْ
وِالكـُلْ دَابْ فِى الزّعِيمْ، عَلـَشَانْ لِهُمْ نَاصِرْ