رجعت الشتوية يافيروز
صوت ستنا فيروز وهى بتغنى "أهى رجعت الشتوية" تحس كدا فيه بفرحة ولهفة لرجوع الشتا.. مش عارف ليه يا ست فيروز والله حرام اللى بتعمليه فينا دا.. يا ست الناس الشتوية بتاعتك غير شتويتنا خالص.. واللى كتبلك كلمات الأغنية دى أصله معداش على مصر ومشربش من نيلها وما جربش يغنيلها..لأنه لو كان عدا عليها فى الشتا اقطع دراعى لو كان كتبها ليكى من أصله أو لو كان كتبها طبعا مكنش حد هيلومه وهو بيوصفلك بالوعات الصرف المسدودة والحفر اللى بقت بحيرات والسواقين اللى بقوا ملاحين سفن وقوارب والأنفاق اللى بقت شبه بطن الزير فى فيلم ابن حميدو وعشان تعدى منها لازم أدوات غطس والمترو اللى لو واحد عطس بيعطل.. فما بالك بشوية مطرة بييجوا من الشتوية بتاعتك بيوقفوا حالنا كلنا.. لكن الغريب بقى لما تلاقى واحد إخوانى فى قناة إخوانية شغال دعا على النظام القديم لأنه السبب فى اللى احنا فيه دا دلوقتى.. ليه يا عم يقولك أصله كان نظام فاسد دا لو مش فاسد مكنتش الحفر والبالوعات المسدودة دي موجودة فى بلدنا لكن تعمل إيه بقى فى الفساد.. طيب يا عم أهو الفساد اتحبس فى السجن والنظام اتغير وكبر وشنبه خط فى وشه وطلعتله دقن متغيرتش بقى ليه البالوعات المسدودة ؟.. عموما على ذكر رجعت الشتوية بقى وكلمات الأغانى لى صديق مفتون بالشعر، دائما ما يصف حبيبته بأن عينها فى الشتا دفاية وفى الصيف مروحة.. والله يا ريت الواحد يقع فى محبوبة زى كدا.. يا سلام دى أحسن من توشيبا.
