باسم يوسف "حالة" تجتمع حولها الأسرة المصرية.. الطلاب يتركون المذاكرة من أجل مشاهدته.. وأدهم: "الإخوان" بتعمل له ألف حساب.. ومى: "البرنامج" الفرحة الحقيقية كل جمعة.. وجورج: عامل زى حفلة أم كلثوم زمان

دشَّن كثير من النشطاء ومحبو باسم يوسف عديدًا من الصفحات الخاصة و"هاشتاج" خاصًّا بباسم على "تويتر"، منها هاشتاج باسم "باسم يوسف" وآخر يحمل اسم "باسمون" وثالث بعنوان "باسم يوسف استايل"، للتعبير عن حبّهم للبرنامج الساخر للإعلامى باسم يوسف، وأنه بسخريته المعهودة يقول ما يريدون أن يقولوه.

وكتب أحمد جمال "المجد كل المجد لكل واحد عنده امتحان بكرة، وبردك هيتفرج على باسم يوسف"، وقال أحمد رياض "باسم يوسف، مستنيك الساعة 11 على قناة سى بى سى فى مسرح البرنامج".
وأضاف باسل معتز "النهارده بالليل ممكن تشوف حلقة باسم يوسف على (سى بى سى) أو ممكن تقرأها من على (تويتر) فى فترة الإعلانات على التايم لاين"، مضيفًا، من أطلق على نفسه يحيى الحياة، "واحدة بتوصف باسم يوسف إن أحلى حاجة فيه إنه طويل وجذاب وممتع.. قولتلها إنتى متأكدة إنك بتوصفى باسم مش حاجة تانية".
واستنكرت أسماء أحمد، قائلة "لو باسم يوسف بيهاجم إقحام الدين فى السياسة وتجار الدين.. يا ريت يفتح قنوات النصارى الدينية هيلاقى شغل هيعجبه أوى وضحك للركب"، وقال أدهم أبو طالب "أكتر حاجة باحبها فى باسم يوسف هى أنه الشخص اللى الإخوان بتعمله ألف حساب".
وتضيف مى زياد "لم يعد الشعب المصرى يأخذ دشه ليلة العيد.. بل ليلة كل جمعة.. يوم إذاعة برنامج (البرنامج) لباسم يوسف.. حـيث الفرحة الحقيقية!"، وتؤكد طالبة أطلقت على نفسها اسم إنشيراح "من مكانى هذا أحب أقولّكم أنا بافكر جديًّا فى حاجة من الاتنين، أولًا: إنى أدخل إنشاء الله إعلام وأشتغل مع باسم يوسف، ثانيًا: أسافر بره". وقالت ميار رأفت "من مميزات يوم الجمعة عند المصريين أن مصر كلها بتبقى قاعدة مستنية حلقة باسم يوسف، الناس اللى بيحبوه وبيكرهوه برده بيستنوه!!"، ويضيف علاء ماهر" القلب: النهادره باسم يوسف، العقل: بس بكرة امتحان، القلب: طب ربع ساعة، العقل: مافيش وقت! ويستمر الصراع بين القلب والعقل".

وكتب أستاذ الكيمياء الفيزيائية بجامعة الأزهر الدكتور محمود خفاجى، "كلما شاهدت برنامج باسم يوسف أتذكر محمود شكوكو عندما كتب فى مدخل عمارته (مشيت فى الجد مالقيتش سيجارة، ومشيت فى الهلس بنيت عمارة!!"، وقال أشرف عاشور، "عندنا فى مصر يوم الجمعة الساعة 11، الجمهورية كلها قاعدة فى بيتها بتتفرج على باسم يوسف. يا إما عشان يضحكوا يا إما عشان يشتموه".
وقالت ميادة جورج "حلقة باسم يوسف بقت عاملة زى حفلة أم كلثوم زمان، كل الناس بتستعد والعيلة بتتجمع وتجهز الأكل والبيبسى واللب ونربع ع الأرض من الزحمة عشان نتفرج".