كابتن لطيف

لا يكف أغلب المصريين عن الدعاء على الرئيس مرسي لأنه خلال عام استطاع أن يقسم المصريين بسياسات غريبة إلى فرق وشيع.. هذا من أهله وعشيرته وهذا من جيش العدو.. هذا مؤيد وهذا معارض.. هذا تمرد والتاني تجرد.. وعلى ذكر تمرد وتجرد والسجال الدائر بينهما حسيت إني بتفرج على ماتش كورة وسامع صوت كابتن لطيف وهو عمال يذيع المباراة الدائرة بينهما:
كابتن لطيف: بيقولوا اللعيب اللى اسمه تمرد أبو كف ده لعيب كبير قوي.. وجامد قوي.. وعدى تمرد وخد الأول والتاني... ياه ده تمرد طلع لعيب خطير وجامد أوي يا جماعة خدوا بالكو منه.. عموما تمرد سجل كذا جون أهو وانتوا زي ما انتوا عارفين الكورة جوان يا جماعة والجو الأيام دي جو تمرد.. وتمرد بصراحة ممرطة تجرد وماسحة بيها الأرض..
علي زيور: إيه الطعامة دي.. إيه الحلاوة دي.. تمرد يا جماعة مكتسحة الملعب والنتيجة دلوقتي 50 صفر لصالح تمرد.
شلبي: الله عليك يا حبيب والديك تسلم يابني إنت أكيد من عالم تاني.. بيبو وبشير.. بيبو والجون.. بيبو وبشير.. بيبو والجون.. الله عليكي يا تمرد.. وريهم يابني عرفهم إحنا مين.
الشربيني: تمرد أهو في منطقة العمليات والمناورات.. تمرد دي مارادونا يا جماعة.. على فكرة المخرج فاهمني يا جماعة..