تامر حسني لـ"رامي جمال": واثق أنك مؤمن
وجه النجم تامر حسني رسالة للفنان رامي جمال بعد إعلان مرضه بالبهاق عبر صفحته الشخصية على موقع التواصل الاجتماعي فيس بوك.
وكتب تامر: "إلى الفنان الكبير الصديق الحقيقي والمحترم رامي جمال يا حبيبي انت فنان كبير ومحبوب وليك قيمتك وكل الناس بتحبك ومفيش حاجه هتعطلك عن نجاحك، وتعبك دا لاهو مؤذي ولا مُعدي وكل الناس جواها تعب في منه اللي ظاهر وفي منه اللي مش ظاهر حتى لو كان تعب نفسي أو مادي كل شخص جواه وجع من حاجه معينه المهم اننا نبص ونتعلم من اللي ظروفهم أصعب مننا ورغم كدا عندهم صبر وبينجحوا في الإختبار وبيقولوا الحمدلله ومكملين وعندهم إراده وبينجحوا اكتر من الأول".
وأضاف: "لازم تكمل نجاح يا رامي وشيل أي هلاوس من دماغك واوعى تخبي نفسك اللي بيحبك بيحبك لشخصك وفنك صدقني دي حاجه عاديه يا رامي والله ملهاش أي تأثير لا عليك ولا على جمهورك بالعكس بقى انت اكيد شايف الناس كلها طيبين ازاي ونفسهم يفرحوك وبعدين إفتكر أن مايكل چاكسون جاله نفس اللي جالك وبقى اسطوره مبتتكررش خاااااص وانت فنان وعارف".
وتابع تامر حسني: "انا واثق انك مؤمن وبتحمد ربنا وهتقوم وهتكمل وهفكرك قدام كل الناس اللي شايفه كلامي انك هتنجح اكتر واكتر وربنا هيكرمك اجمل كرم وهتشوف قريب.. بحبك يا رامي".
